د افغانستان د پرمختللو ځواکونو خوځښت: د طالبانو څلور کلنه واکمني، د افغان ولس لپاره څلور کاله تیاره او تباهي وه

د افغانستان د پرمختللو ځواکونو خوځښت د طالبانو د څلور کلنې واکمنۍ په مناسبت په خپاره شوي پرېکړه‌لیک کې دغه ډله په جوړښتي ښځه‌دښمنۍ، د بشري حقونو په سیستماتیک نقض او د یوې نسل د راتلونکي په له منځه وړلو تورنه کړې ده.په دې اعلامیه کې ویل شوي چې طالبان د وسلو په زور او د نړیوالې ټولنې د بې‌پروايۍ په سیوري کې پر افغانستان مسلط شول، او په تېرو څلورو کلونو کې یې د هېواد د معاصر تاریخ تر ټولو تیاره دوره رامنځته کړه؛ داسې دوره چې د وګړو بنسټیز حقونه، په ځانګړې توګه د ښځو او نجونو حقونه، په بشپړه توګه تر پښو لاندې شول او د یوې نسل هیلې له منځه ولاړې.د پرمختللو ځواکونو خوځښت د طالبانو «سیستماټیک توګه د ښځې ضد» غندنه کړې او له نړیوالې ټولنې، ډيموکراسۍ له ملاتړو او د بشري حقونو له سازمانونو یې غوښتي چې د طالبانو واکمني په هېڅ ډول په رسمیت ونه پېژني، پر دې ډله سیاسي او اقتصادي فشارونه زیات کړي او د ښځینه او مدني فعالانو لپاره خوندي پناه ځایونه برابر کړي.دغه خوځښت همداراز ټینګار کړی چې د بشري حقونو د ناقضینو د تعقیب لپاره نړیوال میکانیزم جوړ شي او د محرومو نجونو لپاره د لیرې زده‌کړې پروګرامونو کې پانګونه وشي.یاده دې وي چې د زمري ٢٤ مه (د اګست ۱۵مه) هغه ورځ ده چې طالبان د کابل په نیولو سره د جمهوریت وروستۍ سنګرونه مات کړل او د استبداد او شاتګ تور سیوری یې پر ټوله افغانستان خپور کړ. له هغې ورځې ښځې له کار او زده‌کړې محرومې شوې، رسنۍ چوپې شوې، او زرګونه فعالان، خبریالان او بې‌ګناه وګړي یا زنداني شول، یا ورک شول او یا یې ژوند له لاسه ورکړ.