د هیلې کړکۍ خوځښت طالبانو د جنسي توپیر پر بنسټ د تبعیض (جنسیتي اپارتاید) په تور تورن کړ

د طالبانو د څلور کلنې واکمنۍ د کلیزې په درشل کې، د ښځو خوځښت «هیلې کړکۍ» په خپاره کړي اعلامیه کې دا دوره «د ښځو څلور کاله اسارت» بللې او د طالبانو کړنې یې د معاصرې نړۍ بې‌ساري «جنسیتي اپارتاید» یوه بېلګه ګڼلې ده.په اعلامیه کې ویل شوي چې له د ۲۰۲۱ د اګست ۱۵مې نیټې راهیسې، طالبانو په ښځو او نجونو د ښځه‌ ضد تګلارو له لارې، له بنسټیزو بشري حقونو بې‌برخې کړې دي. دغه بنديزونه په دې کې شامل: د منځنیو ښوونځیو او پوهنتونونو تړل چې تر دوو میلیونو زیاتې نجونې یې له زده کړو محرومې کړې دي، د ښځو په پراخه کچه له دولتي ادارو ایستل، په خصوصي سکتور کې د کار مخنیوی، له فرهنګي، هنري، ورزشي او رسنیزو فعالیتونو څخه محرومیت، د تګ راتګ سخت بندیزونه، د اعتراضونو په زور ځپنه، د ښځینه فعالانو نیول او ورکول، او جبري حجاب کول دي.د هیلې کړکۍ غورځنګ ټینګار کړی چې دغه ډول تګلارې د بشري حقونو د نړیوالې اعلامیې، د نړیوالو میثاقونو او د ښځو پر وړاندې د تبعیض د له‌منځه وړلو د کنوانسیون ښکاره سرغړونه ده او باید د «بشریت پر وړاندې د جنایت» په توګه وڅېړل شي.په اعلامیه کې د دې خوځښت څلور اساسي غوښتنې داسې یادې شوې دي:۱. د ښځو پر زده‌کړو، کار او ټولنیز ګډون ټول بنديزونه بې‌ځنډه لغوه شي؛۲. ټول سیاسي بندیان بې له قیده او شرطه آزاد شي؛۳. پر طالبانو او د هغوی پر ملاتړو د موخه ییز بندیزونو لګول، شتمنۍ کنګل کول او د سفر بندیزونه عملي شي؛۴. تر هغو چې د بشري حقونو او جنسیتي برابري بشپړ درناوی نه وي شوی، نړیواله ټولنه دې د طالبانو واکمني په رسمیت ونه پېژني.دغه خوځښت خبرداری ورکړی چې د نړیوالې ټولنې چوپتیا او بې‌غورۍ به د طالبانو له ملګرتیا سره مانا ولري، او ټینګار یې کړی چې د افغانستان ښځې «غلي قربانیان نه، بلکې د مدني مقاومت مخکښان» دي چې تر آزادۍ، عدالت او برابري پورې به خپلې مبارزې ته دوام ورکوي.