ریچارد بېنټ: طالبان باید د مشروع حکومت په توګه ونه‌پېژندل شي

ریچارد بېنټ، د ملګرو ملتونو د بشري حقونو ځانګړی راپور ورکوونکی د طالبانو د څلور کلنې واکمنۍ د کلیزې په تړاو خبرداری ورکړی چې نړیواله ټولنه باید د دې ډلې د اړیکو د عادي کولو هر ډول هڅې رد کړي.بېنټ د زمري ۲۳مه، پنج‌شنبه، په خپله رسمي «ایکس» پاڼه کې لیکلي چې د سختو فشارونو او پراخو بندیزونو سره سره، د افغانستان خلک، په ځانګړي توګه ښځې، لا هم د طالبانو د ځپونکو تګلارو پر وړاندې مقاومت کوي.هغه باور لري چې دا وضعیت به دوام ونه‌کړي او راتلونکی به د بدلون او هیلې وړ وي.په ورته وخت کې، د ملګرو ملتونو ۲۵ د بشري حقونو کارپوهانو په ګډه اعلامیه کې ټینګار کړی چې بدلون باید د افغانستان د خلکو په مشرتابه او غوښتنه رامنځته شي، او هره ورځ ځنډ د «د طالبانو د استبدادي واکمنۍ د لا پیاوړتیا» سبب ګرځي.له هغه وخت راهیسې چې طالبان بیا واک ته رسېدلي، د بشري حقونو پراخې سرغړونې، د ښځو له زده‌کړې او کاره محرومول، او د بیان او راټولېدو د آزادۍ سخت محدودول، په نړیوالو راپورونو کې په دوامداره توګه غندل شوي دي.د امریکا د بهرنیو چارو وزارت هم تازه دغه برخې تایید کړي دي.