د بخښنې نړیوال سازمان: طالبانو د افغانستان حقوقي نظام له منځه وړي او خپله سخت دریځ شریعت یې حاکم کړی

د بخښنې نړیوال سازمان ویلي چې طالبان د واک ته له بیا رسېدو وروسته د افغانستان ټول حقوقي جوړښتونه لغوه کړي او پر ځای یې د خپلې سخت دریځې شریعت پر بنسټ مذهبي نظام جوړ کړی دی.دغه سازمان د جمعې په ورځ، د کابل د سقوط له څلورمې کلیزې سره هم مهاله، په خپره شوې اعلامیه کې ویلي چې د طالبانو واکمني د «خپلې خوښې پر بنسټ د عدالت پلي کولو» ولاړه ده او باید ژر تر ژره د افغانستان قانوني چوکاټ او د قانون حاکمیت د نړیوالو ژمنو له مخې بېرته راژوندی شي.بخښنې نړیوال سازمان ټینګار کړی چې د طالبانو قضایي نظام له تضادونو ډک، له مجازاتو معاف، ناعادلانه او غیرعلني دی او پرېکړې د قاضي یا مفتي د شخصي سلیقې پر اساس کېږي.په اعلامیه کې د عام محضر د دورو وهلو او نورو ډولونو ځپنې او بد چلند یادونه هم شوې ده.سمیرا حمیدي، د بخښنې نړیوال سازمان د جنوبي آسیا مسؤله، ویلي: «د طالبانو څلور کلنه واکمني یو مبهم او جبري عدلي نظام پرې ایښی چې اطاعت د حق پر ځای او چوپتیا د حقیقت پر ځای وړاندې کوي.» هغې زیاته کړې چې طالبان نه یوازې له نړیوالو بشري معیارونو لرې شوي، بلکې د افغانستان د تېرو شلو کلونو عدلي پرمختګونه یې شا ته اړولي دي.راپور ښيي چې طالبان د کورنیو محکمې، د ځوانانو عدلي څانګې او د ښځو پر وړاندې د تاوتریخوالي د رسېدنې مرکزونه لغوه کړي او ښځې یې له عدالت او د تاوان د جبران له حقه محرومې کړي دي.د بخښنې نړیوال سازمان ویلي چې د طالبانو محکمې ډېری وخت د تړلو دروازو تر شا ترسره کېږي، هیڅ څارونکی میکانیزم نه شته، ډېر کسان بې له حکم نیول کېږي، بې محکمې په زندانونو کې ساتل کېږي او حتی ورک کېږي.دغه سازمان له طالبانو غوښتي چې سمدستي خپل ځپنې فرمانونه لغوه کړي، د بدني مجازاتو عملي کول ودروي او د ټولو افغانانو حقونه تضمین کړي. همدارنګه یې له نړیوالې ټولنې غوښتنه کړې چې د سیاسي فشار او اصولي تعامل له لارې طالبان دې دې ته اړ کړي چې روڼ قانوني نظام بېرته راژوندی کړي او د بشري حقونو درناوی وکړي.