په کابل د سقوط څلورمه کلیزه؛ هبت‌الله د طالبانو له کابینې د «سرپرست» لقب لېرې کړ

د کابل د سقوط له څلورمې کلیزې سره هممهاله، د طالبانو مشر هبت‌الله اخندزاده په تازه پیغام کې اعلان کړی چې د دې ډلې وزیران او لوړپوړي چارواکي نور د «سرپرست» له لقب څخه کار وانه خلي.دغه پیغام چې نن جمعه، د زمري په ۲۴ مه خپور شوی، د طالبانو د کابینې ټولو غړو ته په خطاب کې ټینګار کوي چې دوی باید «د شرعي نظام او مسلمانانو په خدمت» کې وي او د ولس د هوساینې لپاره هڅې وکړي. هبت‌الله په یوه بله برخه کې ویلي دي: «ټول وزیران او کابینه، د سرپرست کلیمه مه کاروئ.»طالبانو له دې وړاندې، کله چې د ۲۰۲۱ د اګست په ۱۵ نېټه بیا پر افغانستان واکمن شول، خپل حکومتي جوړښت یې «سرپرست حکومت» بللی و، خو د دې لقب د ختمولو لامل یې هبت‌الله نه دی روښانه کړی.هبت‌الله په خپل پیغام کې افغانستان د «اشغال تر پای» وروسته یو «مقدس شرعي نظام» بللی او ادعا یې کړې چې په ټوله کچه امنیت ټینګ شوی او خلک له «فساد، ظلم، غصب او غلا» خلاص شوي دي. هغه له خپلو غړو غوښتي چې شکر وباسي او خبرداری یې ورکړی چې ناشکري به «سخت عذاب» ولري.سره له دې چې دا لقب لېرې شوی، طالبان تر اوسه نوی اساسي قانون نه دی معرفي کړی او ټول حکومتي جوړښت یې د ډلې د مشر د فرمانونو او د هغه د شخصي برداشت پر بنسټ اداره کېږي.دغه ډله څلور کاله وړاندې د پخواني ولسمشر اشرف غني د هیواد له پريښودو وروسته کابل ته ننوتل او له هغه وخته یې د افغانستان حقوقي او سیاسي نظام بدل کړی دی.