د خبریالانو نړیوال فدراسیون: د طالبانو له واکمنۍ څلور کاله وروسته، په افغانستان کې د آزاد ژورنالیزم ساه بنده شوې ده

د نړیوال فدراسیون د خبریالانو اداره خبرداری ورکوي چې د طالبانو د څلور کلنې واکمنۍ وروسته، د افغانستان رسنۍ له بې‌ سارې ځپنې سره مخ دي او خبریالان، په ځانګړي ډول ښځینه خبریالانې، د ګواښونو، سانسور او فشارونو لاندې کار کوي.دغه اداره په یوه خبرپاڼه کې چې نن د زمري په ۲۴مه خپره شوې، ویلي دي چې د طالبانو لخوا د رسنیو ځپنه ورځ تر بلې زیاتیږي او خبریالان پرله‌ پسې د تاوتریخوالي، نیونې، ځورونې او امنیتي فشارونو سره مخ دي.د افغانستان د خبریالانو مرکز د موندنو له مخې، طالبانو یوازې په تېر یوه کال کې د رسنیو او خبریالانو د حقونو ۱۷۲ پېښې نقض کړې دي، چې دا شمېر د ۲۰۲۴ میلادي کال په پرتله ۲۴ سلنه زیاتوالی ښيي.د سویلي آسیا د رسنیو د آزادۍ راپور هم څرګندوي چې له هغه وخت راهیسې چې طالبان بیا واک ته ورستانه شول، له نیمایي زیاتې رسنۍ تړل شوي دي، او یوازې په تېر کال کې نورې ۲۲ رسنۍ هم د فعالیت بندېدو ته اړ شوې دي.اوس مهال شاوخوا ۴۷۰ رسنۍ په افغانستان کې فعالیت لري، خو د دغو رسنیو منځپانګه باید په بشپړ ډول د طالبانو له سختو لارښوونو سره سم وي.دغه اداره د وروستیو خبریالانو نیونو ته، په ځانګړي ډول په دایکنډي کې د رادیو نسیم د مسوول مدیر او څو خبریالانو د نیولو پېښو ته اشاره کړې، او ټینګار یې کړی چې ښځینه خبریالانې له لا سختو بندیزونو سره مخ دي؛ د دوی شمېر له ۲۸۳۳ تنو مخکې له ۲۰۲۱ څخه، سږ کال ۷۴۷ ته راټیټ شوی دی.د نړیوال فدراسیون د خبریالانو اداره له طالبانو غواړي چې ژر تر ژره داسې شرایط برابر کړي چې خبریالان وکولای شي بې له وېرې او ګواښ څخه خپل کار ترسره کړي، او له نړیوالې ټولنې یې غوښتنه کړې چې د افغانستان له رسنیو او جلاوطنه خبریالانو ملاتړ زیات کړي.