د بشري حقونو د څار بنسټ: جرمني دې د کډوالو د ستنولو پر ځای د افغانستان له ښځو ملاتړ وکړي

د طالبانو د بیا واکمنېدو په څلورمه کلیزه کې، د بشري حقونو د څار بنسټ له جرمني غوښتنه کړې چې د افغان کډوالو په اړه خپلې تګلارې له سره وارزوي او د طالبانو له حکومت سره د کډوالو د ستنولو پر ځای، د افغان ښځو د حقونو ملاتړ په لومړیتوب کې کېږدي.فرشته عباسي، چې د افغانستان څېړونکې ده، په یوه مقاله کې ټینګار کړی چې د افغان ښځو مقاومت د طالبانو د بندیزونو او ځپنې پر وړاندې د زړورتیا بېلګه ده، او بهرني دولتونه، په ځانګړي ډول جرمني، باید له دې څخه الهام واخلي.هغې لیکلي: «کډوال هغه هېواد ته ستنول چې د بشري حقونو نقض په کې روان دی، نه یوازې د بحران د حل مرسته نه کوي، بلکې د افغانستان ټولنې ته خطرناک پیغام لېږي.»عباسي د جرمني د حکومت هغې پرېکړې ته هم اشاره کړې چې د جولای میاشت کې یې ۸۱ افغان کډوال بېرته ستانه کړي وو، او خبرداری یې ورکړی چې دا ډول کړنې د طالبانو د اوسني وضعیت د عادي کولو په معنا دي.د بشري حقونو د څار بنسټ د طالبانو د مشر هبت‌الله اخندزاده او د دوی د سترې محکمې د مشر عبدالحکیم حقاني پر وړاندې د بشریت ضد جنایتونو او د ښځو پر وړاندې د سیستماتیک تبعیض د تورونو له مخې د نړیوالو د نیولو د حکم یادونه وکړه او ټینګار یې وکړ چې اروپایي هېوادونه باید د دغو حکمونو ملاتړ وکړي او د ښځو د حقونو د نقض په وړاندې چوپتیا ختمه کړي.عباسي مخکې هم خبرداری ورکړی و چې له طالبانو سره د کډوالو د ستنولو په اړه هر ډول خبرې اترې د داسې یو واکمنیت د مشروعیت ورکولو په معنا دي چې له نړیوالو قوانینو او بشري حقونو سره په ټکر کې دی، او افغانانو ته ناسم پیغام لېږي.