د افغانستان د ښځو د خلاصون او پراختیا بنسټ: د سقوط څلور کلنۍ، د انساني ارزښتونو د محو کېدو او د طالبانو د ظلم دوام نښه ده

له هغه وخته چې د افغانستان اسلامي جمهوریت د طالبانو لاس ته ولوېد، څلور کاله تېر شول؛ څلور کاله چې مدني بنسټونه یې د هېواد د معاصر تاریخ تر ټولو تیاره پړاو بولي.د افغانستان د ښځو د خلاصون او پراختیا بنسټ په یوه خپره شوې اعلامیه کې ویلي دي چې د کابل د سقوط ورځ یوازې د یوه سیاسي نظام پای نه و، بلکې په افغانستان کې د «انساني او بشري ارزښتونو زوال» و.دغه بنسټ ټینګار کوي چې په تېرو څلورو کلونو کې د طالبانو د سیاستونو تر ټولو سترې قربانيان د افغانستان ښځې وې؛ ښځې چې له لومړنیو بشري حقونو لکه زده‌کړې، کار، ټولنیز او سیاسي ګډون څخه محرومې شوې او په عملي ډول له ټولنې ایستل شوې دي.د دغه بنسټ په وینا، طالبانو د خلکو، په ځانګړي ډول د ښځو، شخصي او کورنی ژوند تر سختو بندیزونو لاندې راوستی او د ولسي اعتراضونو ځواب یې په «فزیکي، رواني او جنسي زورزیاتي، زندان، پټو وژنو او خونړیو ځپنو» ورکړی دی. همدارنګه له دوو زرو زیات د پخواني دولت سرتېري پرته له قانوني څېړنې وژل شوي یا ورکېدلي دي او ګڼې کورنۍ د جبري کډوالۍ پر لور ټېل وهل شوې دي.یاد بنسټ طالبان په ملي او نړیواله کچه «یوه ترهګره ډله» بللې او ویلي یې دي چې دغه ډله اوس د افغانستان خلک په قصدي او پټه توګه تر بریدونو لاندې نیسي، بې له دې چې کومه حساب‌ورکونه موجوده وي.په اعلامیه کې همدارنګه ویل شوي چې طالبان نه د خلکو او ښځو مدني غوښتنو ته غوږ نیسي او نه د ښځو د وضعیت په اړه ځواب ویونکي دي. د دغه بنسټ په باور، د طالبانو په لید کې د ښځو ازادي یوازې په «خوړل، څښل او د طبي ملاتړ پرته زېږون» کې راخلاصه شوې ده.طالبانو هڅه کړې چې د نمایشي اقتصادي او تبلیغاتي پروژو په ترسره کولو د عامه ذهنیت ګډوډ کړي او له ځانه مثبت انځور وړاندې کړي، په داسې حال کې چې په عمل کې د دوی ځپنې او ایډیالوژیکې تګلارې دوام لري.د افغانستان د ښځو د خلاصون او پراختیا بنسټ خبرداری ورکړی چې د طالبانو په رسمیت پېژندل به د فاشیزم او ترهګرۍ په پیاوړتیا تمام شي؛ ځکه دا ډله د افغانستان د خلکو او ښځو ټولې غوښتنې سانسوروي او یوازې هغه څه مني چې له خپلې ایډیالوژۍ سره برابر وي.دغه بنسټ له ملګرو ملتونو غوښتي چې د افغانستان د وضعیت په اړه بې‌طرفه او واقعي راپورونه جوړ کړي او د هېوادونو له خوا د طالبانو د رسمیت پېژندنې مخه ونیسي.په پای کې، دغه بنسټ اعلان کړی چې د افغانستان ښځې د طالباني نظام په دایره کې هېڅ ډول حق نه غواړي او د هېواد یوازینۍ د خلاصون لار د نظام بدلون او د یو ولسواک او دموکراتیک نظام جوړول ګڼي.