اوتنبایوا: د کډوالو پراخ ستنیدل کولای شي افغانستان د بشري بحران پر لور یوسي

رزا اوتنبایوا، د ملګرو ملتونو د مرستندویه دفتر (یوناما) مشره، خبرداری ورکړی چې د افغان کډوالو د ستنېدو دوامداره څپې به افغانستان د نوي بشري بحران سره مخ کړي، که نړیواله ټولنه بېړنۍ او پراخه مرستې ونه کړي.اوتنبایوا چې د اسلام‌قلعه له سرحدي لارې لیدنه کړې، ویلي چې هره ورځ سلګونه کورنۍ له ایرانه شړل کېږي. د هغې په وینا، ستنېدونکي کډوال له ستړیا، رواني ستونزو او د راتلونکي له نامعلوم برخلیک سره مخ دي، او تر ټولو زیانمنې ډلې یې ښځې او ماشومان دي چې حتا لومړنیو خدماتو ته لاسرسی نه لري.هغې ټینګار کړی چې یوازې د ۲۰۲۵ کال په اوږدو کې د ۱.۳ میلیونو کسانو بېرته راتګ به پر هغه هېواد سخت فشار واچوي چې شاوخوا ۷۰ سلنه وګړي یې له بیوزلي سره مخ دي. اوتنبایوا خبرداری ورکړی: «د دې وضعیت له پامه غورځول به د انسانانو په ژوند تمام شي.»د کډوالو عالي کمېسارۍ (UNHCR) ویلي، د ستنېدونکو د بیړنیو اړتیاوو پوره کولو ته هڅې روانې دي، خو د دې نهاد مالي سرچینې د پای ته رسېدو په حال کې دي.د راپورونو له مخې، ایران د اسراییلو پر وړاندې د جګړې له پیلېدو وروسته د افغان کډوالو د ایستلو لړۍ چټکه کړې او تر اوسه یې له یوه میلیونه او سل زرو زیات بې اسنادو افغانان بېرته لېږلي دي. همدارنګه پاکستان هم د شاوخوا یوه میلیونه افغان کډوالو د اوسیدو د تمدید نه کولو له امله د هغوی د ایستلو پروسه پیل کړې ده.د نړیوال کډوالۍ سازمان (IOM) شمېرې ښيي چې په تېرو دوو کلونو کې شاوخوا ۴ میلیونه افغانان له ایران او پاکستانه بېرته ستانه شوي دي. دغه سازمان خبرداری ورکوي چې که سیمه‌ییزه همکاري او نړیوال ملاتړ بېړنی زیات نه شي، د بېرته ستنېدو بحران به د پراخ بشري ناورین لامل شي چې نه یوازې افغانستان، بلکې ټولې سیمې ته زیان رسوي.د استوګنې د نه شتون ستونزه د ستنېدونکو تر ټولو جدي ننګونه بلل کېږي. د ملګرو ملتونو د هستوګنې پروګرام مشرې استفاني لوز ویلي، ګڼې کورنۍ د اوسېدو ځای نه لري او عاجلې مرستو ته اړې دي.