د افغانستان د خوارځواکۍ ژور بحران؛ میلیونونه میندې او ماشومان له ګواښ سره مخ دي

د خوراک نړیوال پروګرام (WFP) په تازه راپور کې خبرداری ورکړی چې د نړیوالو مرستو د کمېدو او د مالي سرچینو د بندیز له امله میلیونونه افغان میندې او ماشومان له خوارځواکۍ سره مخ دي.د دغه سازمان د یکشنبې په ورځ (زمري ۲۶مه) د خپرې شوې اعلامیې له مخې، اوس مهال شاوخوا ۹.۵ میلیونه کسان په ټول افغانستان کې له شدیدې خوړو ناامنۍ سره لاس او ګرېوان دي او تر ۴.۶ میلیونه زیاتې میندې او ماشومان د بیړنیو مرستو اړتیا لري. د اټکلونو له مخې، یوازې سږکال نږدې ۳.۵ میلیونه ماشومان تر پنځو کلونو کم عمره او تر یوه میلیونه زیاتې امیندوارې او شیدې ورکونکې میندې د حاد خوارځواکۍ له خطر سره مخامخ دي.WFP ویلي، د دې لپاره چې تر ۲۰۲۵ کال پورې خپلې بشردوستانه پروژې پرمخ یوسي، لږ تر لږه ۶۵۰ میلیونه ډالرو ته اړتیا لري. د بودجې د کموالي له امله ځینې تغذیوي مرکزونه اړ شوي دي چې ناروغان بېرته واستوي.دغه سازمان ټینګار کړی چې ښځې او ماشومان تر ټولو ډېر زیانمن دي. د طالبانو د بندیزونو له امله ښځې له زده‌کړې، کار او نورو آزادیو محرومې شوي او د ژوند د ژغورنې لپاره د خوراک نړیوال پروګرام په مرسته تړلي پاتې دي.افغانستان په وروستیو کلونو کې د اقتصادي او بشري کړکېچونو شاهد و. د نړیوالو مرستو کمېدل او د طالبانو بندیزونه د خلکو پر ژوند سخته اغېزه کړې او د خوارځواکۍ کچه یې په ځانګړي ډول د ماشومانو او میندو تر منځ لوړه کړې ده.بشردوستانه سازمانونه خبرداری ورکوي چې که عاجلې مرستې زیاتې نه شي، د افغانستان د بشري وضعیت د لا خرابېدو خطر ډېر جدي دی.