ملګري ملتونه: د افغانستان د ښځو د حقونو بحران د «عادي کېدو» په حال کې دی

د ملګرو ملتونو د ښځو د چارو استازې په افغانستان کې خبرداری ورکړی چې د طالبانو له‌خوا د ښځو پر وړاندې لګول شوې بندیزونه اوس د نړۍ تر ټولو جدي د ښځو د حقونو بحران بلل کېږي او دغه وضعیت ورو ورو د عادي کېدو په لور روان دی.سوزان فرګوسن، چې په افغانستان کې د دې ادارې استازې ده، د یکشنبې په ورځ (زمري ۲۶مه) په یوه ویډیويي پیغام کې وویل، طالبان له ۲۰۲۱ کال راهیسې د پرله‌پسې فرمانونو په صادرولو سره ښځې او نجونې له بنسټیزو حقونو او له ټولنیز حضور څخه محرومې کړې دي.نوموړې زیاته کړه، د طالبانو د «امر بالمعروف او نهی عن المنکر» د قانون تصویب تېر کال د ښځو د منظم ایستلو د یوې نوې مرحلې پیل و. د هغې په وینا، ښځې اوس نه یوازې په ټولنیزو ځایونو کې، بلکې آن د کورنیو په فضا کې هم د ناامنۍ احساس کوي.فرګوسن ټینګار وکړ: «موږ باید اجازه ور نه کړو چې د ښځو د حقونو غصب د یوه عادي او د منلو وړ حالت په توګه وپېژندل شي.» هغې له نړیوالې ټولنې وغوښتل چې د افغان ښځو، د هغوی د کاروبارونو او د ښځو د حقونو د ملاتړ نهادونو پیاوړتیا ته دوام ورکړي.په تېرو څلورو کلونو کې طالبانو پر ښځو او نجونو سخت محدودیتونه لګولي؛ لکه د زده‌کړو بندیز، د کار محرومیت او د تګ راتګ جدي محدودیتونه.دا ګامونه د پراخو نړیوالو نیوکو سره مخ شوي، خو نه یوازې درول شوي نه دي، بلکې لا پسې زیات شوي دي.