د بدخشان په ترافيکي پېښه کې دوه مېرمنې مړې او څلور نور ټپيان شو

سيمه‌ييزې سرچينې په بدخشان ولايت کې وايي، يو د «پېک اپ» ډوله موټر د شهر بزرګ ولسوالۍ د سياه‌سنگ کلي په اړوند کې له لارې ووت او چپه شو.د دې پېښې په پايله کې دوه مېرمنې مړې شوې او څلور تنه نور چې درې مېرمنې او د یو سړی موټر چلوونکی په کې شامل دي، ټپيان شوي دي.د طالبانو د پوليسو وياند په بدخشان کې د دې پېښې پخلی کړی او ويلي يې دي چې ټپيان روغتيايي مرکزونو ته لېږدول شوي دي. د ده په وينا، د ځينو ټپيانو روغتيايي حالت د اندېښنې وړ دی او د پېښې د دقيق علت معلومولو څېړنې روانې دي.د سيمې اوسېدونکي وايي، دا پېښه د تېرې ورځې د غرمې پر مهال هغه مهال رامنځته شوه چې موټر له لارې ووت او درې ته پرېوت.عياني شاهدان زياتوي چې د يادې ولسوالۍ تنګې او خاوريزې لارې د ورته پېښو د زياتېدو لامل ګرځېدلي دي.بدخشان ولايت، په ځانګړي ډول د هغه غرني ولسوالۍ لکه شهربزرګ، تل د ترافيکي پېښو شاهد پاتې شوی دی. د دې ولايت اوسېدونکي باور لري چې د معیاري سړکونو نشتوالی، د فرعي لارو خرابوالی او د غير معياري موټرو کارونه د مرګونو پېښو د ډېرېدو اساسي عوامل دي.د سيمه‌ييزو شمېرو له مخې، په وروستيو کلونو کې لسګونه کسان په ورته پېښو کې مړه يا ټپيان شوي دي.