د طالبانو مشر د نجونو ديني زده‌کړې هم بندې کړې

هغه سرچينې چې د طالبانو له مشرۍ سره نږدې دي تأييدوي چې د دې ډلې مشر، هبت‌الله اخندزاده، نوی حکم صادر کړی دی چې له مخې یې د ښځو او نجونو ديني زده‌کړې هم درول کېږي.د العربيه د راپور له مخې، دا پرېکړه په داسې حال کې شوې چې طالبانو مخکې د منځنيو، ليسو او پوهنتونونو دروازې پر نجونو تړلې وې. اوس د دې نوي فرمان له مخې، آن د نجونو ديني مدرسې هم اجازه فعاليت نه لري.ويل کېږي چې د دې پرېکړې لومړی عملي ګام د هغو نجونو مخنيوی دی چې غواړي د فراغت سند ترلاسه کړي.سرچينې العربيه ته ويلي چې دا پرېکړه د کندهار د وروستي کابينې په ناسته کې مطرح شوې وه او ګڼو وزيرانو يې جدي مخالفت کړی دی. د دوی په باور، دغه بندیز د قرآن او حديث له څرګندو نصوصو سره په ټکر کې دی.ځينې وزيرانو ټينګار کړی چې اسلام زده‌کړې هم پر ښځو او هم پر سړو واجب ګرځولې دي.سره له دې نيوکو، اخندزاده له خپلو وزيرانو غوښتي چې داسې شرعي دليل وړاندې کړي چې د بالغه نجونو له کوره د وتلو اجازه توجيه کړي. دا موضوع مخکې د لوړو زده‌کړو د بندېدو پر مهال هم راولاړه شوې وه.د بشري حقونو نړيوال بنسټونه او سازمانونه څو څو ځله د طالبانو پر سختو بندیزونو پر ښځو او نجونو نيوکې کړي دي. اوس چې د زده‌کړې وروستۍ دروازه هم وتړل شوه، مدني فعالان او نړيوال سازمانونه خبرداری ورکوي چې دا پرېکړه به د افغانستان لپاره نه جبرانېدونکي ټولنيز او کلتوري زيانونه ولري.طالبانو له ۲۰۲۱ د اګست له ۱۵ نېټې وروسته چې پر کابل واکمن شول، خپله سخت‌دريځانه تفسیر له شريعت څخه پر خلکو تپلی دی؛ داسې تفسير چې تر ټولو زيات زيان يې افغان ښځې او نجونې ليدلي دي.