د کډوالو ستنېدل دوام؛ نږدې ۱۷۰۰ کورنۍ په یوه ورځ افغانستان ته ستنې شوې

د افغان کډوالو د بېرته ستنېدو لړۍ له ایران او پاکستانه دوام لري، او پرون (جمعه، د زمري ۳۱مه) نږدې ۱۷۰۰ کورنۍ افغانستان ته دننه شوې دي.د باختر دولتي خبري آژانس د راپور له مخې، ۹۱۸ کورنۍ د اسلام‌قلعه له لارې، ۱۴۱ کورنۍ د پل ابریشم له لارې له ایران، ۵۴۱ کورنۍ د تورخم له لارې او ۹۳ کورنۍ د سپین‌بولډک له لارې له پاکستانه هېواد ته راغلې دي.دغه شمېر د تېرو ورځو په پرتله ډېر دی، ځکه چې په وروستیو ورځو کې د بېرته ستنېدونکو کورنیو شمېر له زرو کم و.د بېرته ستنېدنې بهیر په داسې حال کې زیات شوی چې د کډوالو د وتلو ضرب‌الاجل په ایران او پاکستان کې پای ته نژدې کېږي. ایران کډوالو ته تر د وږي ۱۵مې پورې مهلت ورکړی او پاکستان هم د «پی‌اوآر» کارت لرونکو اقامت تر د سپتمبر لومړۍ نېټې پورې غځولی دی. له دې وروسته به د ایستلو لړۍ پيل شي.ایراني چارواکو ویلي چې تر اوسه شاوخوا ۱.۲ میلیونه افغان کډوال له ایران بېرته ستانه شوي او تمه ده نږدې ۸۰۰ زره نور هم په روان کال کې ستانه شي.په پاکستان کې د «پی‌اوآر» کارت لرونکو شمېر له یو میلیونه زیات بلل شوی، چې د اقامت له پای ته رسېدو وروسته د ایستلو له ګواښ سره مخ دي.د کډوالو نړيوال سازمان ویلي چې په تېرو دوو کلونو کې نږدې څلور میلیونه افغان کډوال له ایران او پاکستانه هېواد ته ستانه شوي دي.یاده دې وي چې د افغان کډوالو له ګاونډیو هېوادونو بېرته ستنېدل د افغانستان پر یو لوی ټولنیز او اقتصادي ګواښ بدل شوی دی. ډېری کورنۍ له د استوګنځای، روغتیایي او تعلیمي خدمتونو له کمښت سره مخ دي. د ناڅاپي ستنېدنې بهیر پر ښارونو او پولو فشار زیات کړی او نړيوالو سازمانونو خبرداری ورکړی چې د بشري ناورین د مدیریت او د ستنېدونکو د ملاتړ لپاره بیړني ګامونه اړین دي.