د افغانستان د آزادۍ غورځنګ: طالبان د محمد داوود له مړي سره «څرګنده بې‌حرمتي» وکړه

د افغانستان د آزادۍ غورځنګ د محمد داوود د وژل کېدو په تړاو طالبان د «بشري حقونو ښکاره سرغړونکي» بللي او د هغوی کړنه یې د «انساني او اسلامي ارزښتونو ښکاره سپکاوی» نومولی ده.یاد غورځنګ د شنبې په ورځ، د وږي په لومړۍ نېټه، په یوه اعلامیه کې ویلي چې محمد داوود د طالبانو پر وړاندې یو فعال څېره و، چې په ګڼو نظامي عملیاتو کې یې ونډه لرله.د دغه غورځنګ په وینا، د داوود وروستی عملیات د طالبانو د یوه قوماندان حسن په وژل کېدو پای ته ورسېد، چې په هرات کې یې د امنیت د لسمې حوزې مشري کوله او د خپلو ساتونکو سره یو ځای ووژل شو.په اعلامیه کې راغلي چې محمد داوود د طالبانو د یوه «استخباراتي همکار د خیانت» له لارې په نښه شو او د جمعې په ورځ د طالبانو له افرادو سره په نښته کې لومړی ټپي او وروسته په ډزو ووژل شو. د افغانستان د آزادۍ غورځنګ زیاتوي چې د خیانت عامل د تېرې شپې لخوا د دوی له خوا وپېژندل شو او ووژل شو.یاد غورځنګ طالبان تورن کړي چې له وژلو وروسته یې د داوود مړی په سړک کش کړ او بیا یې د ښار په یوه میدان کې ځړولی دی، چې د دوی په باور «د اسلامي، انساني او بشري حقونو له اصولو سره په ټکر کې دی».د هرات ځايي سرچینو هم ویلي چې طالبانو د جمعې په ورځ د یوه سړي مړی، چې د مخالفو ډلو سره د همکارۍ په تور یې ډزې پرې کړې وې، د دې ښار د کندهار دروازې ته نژدې په یوه زاړه ټانک ځړولی و. عیني شاهدانو ویلي چې طالبانو په مړي باندې پښې وهل او ځینو خلکو له دې صحنې ویډیو ثبتوله.په خپرو شویو انځورونو کې ښکاري چې د مړي پر شا یو کاغذ لګول شوی چې ورباندې لیکل شوي: «مرګ پر د افغانستان د آزادۍ غورځنګ».خو د طالبانو د هرات امنیه قوماندانۍ په ټولنیزې شبکې (اکس) کې ادعا کړې چې وژل شوی کس «د غلا په تور شکمن» و او د خلکو د «اطلاع ورکولو» له مخې د طالبانو د امنیتي ځواکونو په عملیاتو کې وژل شوی دی.