د هاوان د یوې مرمۍ د چاودنې له امله په غور کې د يولس کلن ماشوم ګوتې پرې شوې

ځايي سرچینې په فیروزکوه، د غور ولایت په مرکز کې وايي چې د تېر جګړو له پاتې شویو مهماتو څخه د یوې هاوان مرمۍ چاودنې د یو ۱۱ کلن ماشوم ګوتې پرې کړي او څلور نور ماشومان یې ټپیان کړي دي.یاده پېښه پرون د فیروزکوه په «پشته ګاومورک» سیمه کې د کورنیو بې‌ځایه شویو د کمپ ترڅنګ رامنځته شوې ده.د خلیل احمد پلار، عباد، وايي چې زوی یې د نورو ماشومانو سره د کمپ شاوخوا لوبې کولې چې له یوې هاوان مرمۍ سره مخ شو او چاودنه رامنځته شوه. د هغه په وینا، د خلیل احمد د لاس ګوتې پرې شوې او څلور نور ماشومان هم په سطحي ډول ټپیان شول.د ماشوم پلار د مسؤلو بنسټونو پر نا پامۍ نیوکه کوي او وايي: «موږ مخکې څو څو ځله سیمه‌ییزو چارواکو او د ملګرو ملتونو ادارو ته خبرداری ورکړی و چې دلته د جګړو پاتې مهمات شته، خو هېڅ پاملرنه ونه شوه. اوس زموږ ماشومان قرباني کېږي.»هغه زیاتوي چې د پېښې له ورځې تر اوسه، د کمپ ماشومان د احتمالي نورو چاودنو له وېرې له خپلو کورونو نه وځي او په وېره کې ژوند کوي.یاده دې وي چې په غور ولایت کې هم د جګړو له پاتې شویو ماینونو او مرمیو څو څو ځله ملکي وګړي، په ځانګړي ډول ماشومان، قرباني شوي دي.په تېرو دوو لسیزو کې، د جګړو او د پراخو ماین‌ښودنو له امله د سړکونو او پخوانیو امنیتي پوستو په شاوخوا کې د پاتې شویو مهماتو چاودنې لا هم له خلکو قرباني اخلي.