د روغتيا نړيوال سازمان: د کډوالو پراخ ستنېدل د افغانستان پوله له روغتيايي بحران سره مخامخ کړې

د روغتيا نړيوال سازمان په يو تازه راپور کې خبرداری ورکړی چې د افغان کډوالو د پراخ ستنېدو لړۍ له ايران او پاکستانه، د هېواد پولې له جدي روغتيايي ستونزو سره مخ کړې ده.ياد سازمان د يکشنبې په ورځ، د وږي په دويمه نېټه، ويلي چې يوازې د روان کال د اګست مياشتې په نيمایي کې له پنځو اصلي لارو څخه تر ۱۰۶ زرو ډېر کسان افغانستان ته داخل شوي دي. د راپور له مخې، د دغو کسانو شاوخوا ۸۳.۷ سلنه له ايران او ۱۶.۳ سلنه له پاکستانه بېرته راستانه شوي دي.راپور زياتوي، سره له دې چې د جولای په پرتله د ستنېدونکو کډوالو عمومي شمېر کم شوی، خو د تورخم له لارې د ستنېدونکو کډوالو شمېر نږدې درې چنده زيات شوی دی.نړيوال روغتيا سازمان د اړين دواګانو کمښت، د ښځينه روغتيايي کارکوونکو د شتون بندیز او د جنسيت پر بنسټ د خدمتونو نشتوالی د تورخم په پوله کې له سترو ننګونو څخه ګڼلي دي. د تېرې څو اوونيو په ترڅ کې هلته ۵۶۶ بسترې مشورې ترسره شوې دي چې ډېری یې د تنفسي ناروغیو او سختې اوبیزې نس‌نستۍ (اسهال) په اړه وې. سربېره پر دې، له ۲۰ زرو زياتو کسانو د سرې ګډې او د پوليو واکسين ترلاسه کړی دی.په اسلام‌قلعه پوله کې هم شاوخوا ۱۰۷۹ کسانو ته لومړني روغتيايي خدمتونه وړاندې شوي او نږدې ۳۰۰ تنه چې له ټپونو او فزیکي ستونزو سره مخ ول، تداوي شوي دي. دغه راز، د لسو کلونو څخه کم ۲۴ زره ماشومانو ته واکسين ورکړل شوی دی.په سپين‌بولدک او ميلک پولو کې هم زرګونو کسانو ورته روغتيايي خدمتونه تر لاسه کړي دي. يوازې په سپين‌بولدک کې ۸۶۸۳ بسترې مشورې ترسره شوي او له ۲۲ زرو زيات کسان واکسين شوي دي. نړيوال روغتيا سازمان په دې برخو کې د ښځينه کارکوونکو پر شتون او د يو ځای شويو روغتيايي خدمتونو پر وړاندې کولو ټينګار کړی دی.راپور همدارنګه د ساري ناروغیو د مهار لپاره د ايزولاسيون خونو نشتوالی او د هغو کسانو لپاره د امکاناتو کمښت چې له معلوليت يا رواني ـ ټولنيزو ستونزو سره مخ دي، د ميلک په پوله کې له عمده ستونزو ګڼلی دی او پر دې برخه کې یې د لا زياتو پانګونو غوښتنه کړې ده.د نړيوال روغتيا سازمان په باور، که د کډوالو ستنېدل دوام وکړي او د پولو روغتيايي ظرفيتونه پياوړي نه شي، د ساري ناروغيو د خپرېدو او د پراخو انساني بحرانونو د رامنځته کېدو جدي خطر موجود دی.