د ملګرو ملتونو د ښځو اداره: د تلپاتې سولې لپاره د ښځو حضور حیاتي دی

د ملګرو ملتونو د ښځو څانګې په خپل رسمي اکس‌پاڼه کې په یوه پیغام کې ټینګار کړی چې جګړې تر ټولو ډېر زیان ښځو او نجونو ته رسوي، خو په عین وخت کې ښځې د نړۍ په ګڼو هېوادونو کې د سولې غوښتنې او د جګړو وروسته د ټولنو د بیا رغونې په ډګر کې مخکښ رول لوبوي.په پیغام کې راغلي: «جګړه د ښځو او نجونو پر ژوند ویجاړونکي اغېز لري. سره له دې، ښځې په ټوله نړۍ کې د سولې د غورځنګونو مخکښې دي او د جګړو وروسته د ټولنو په بیا رغونه کې مهم رول لري.»ملګري ملتونه د بېلابېلو هېوادونو د تجربو په یادولو سره خبرداری ورکوي چې پرته له جدي ګډون څخه د ښځو، نه تلپاتې سوله تر لاسه کېدای شي او نه هم ریښتینې برابري. دغه اداره وایي د ښځو حضور د خبرو مېز ته یواځې د جنسي عدالت لامل نه ګرځي، بلکې د سولې د هوکړو کیفیت او دوام هم تضمینوي.د ملګرو ملتونو کارپوهان ټینګار کوي چې ښځې د جګړو پر مهال او له هغې وروسته د نورو ټولو قشرونو په پرتله ډېر بارونه پر اوږو وړي ـ له کډوالۍ او بې‌سرپناهۍ نیولې تر تبعیض، تاوتریخوالي او فقره. خو شواهد ښيي چې هرکله ښځو په لوړو سیاسي پرېکړو، په ځانګړې توګه د سولې په خبرو کې برخه لرلې، هوکړې یې ډېرې تلپاتې وې او د ټولنیزې او اقتصادي بیا رغونې بهیر هم چټک شوی دی.ملګرو ملتونو یو ځل بیا له حکومتونو او جګړه کې ښکېلو ډلو غوښتی چې د امنیت شورا د ۱۳۲۵ پرېکړه‌لیک پر بنسټ خپلو نړیوالو ژمنو ته ژمن پاتې شي او د سولې له خبرو تر بیا رغونې پورې په ټولو پړاوونو کې د ښځو ونډه ډاډمنه کړي.دغه اداره همدارنګه نړیوالې ټولنې ته خبرداری ورکوي چې که ښځې د پرېکړو له مېزونو لیرې وساتل شي، ریښتینی صلح او تلپاتې برابري به ناشونې پاتې شي.