طالبان په کابل او فاریاب کې ۱۱ کسان په عام محضر کې په دورو ووهل

د طالبانو سترې محکمې اعلان کړی چې په کابل او فاریاب ولایتونو کې ۱۱ کسان د بېلابېلو تورونو له امله د خلکو په حضور کې په دورو وهل شوي دي.د محکمې د اعلامیې له مخې، د یکشنبې په ورځ (د وږي ۲مه) په کابل کې ۹ تنه د نشه‌يي ټابلیټونو، الکولي مشروباتو او چرسو د پېر او پلور او قاچاق په تور مجازات شوي دي.طالبان وایي، دغو کسانو ته د ۱۰ تر ۳۹ دورو سزا او همدارنګه د اوو میاشتو تر دوو نيمو کلونو پورې د بند جزا ورکړل شوې وه.په یوه بله اعلامیه کې راغلي چې د شنبې په ورځ په فاریاب ولایت د دولت‌اباد ولسوالۍ کې دوه تنه د «غلا» په تور په دورو وهل شوي دي.دا لومړی ځل نه دی چې طالبان له واک ته رسېدو وروسته تورن کسان د خلکو په وړاندې مجازات کوي.د راپورونو له مخې، له ۲۰۲۱ کال راهیسې زرګونه کسان په هېواد کې د طالبانو له لوري د خلکو پر وړاندې په دورو وهل شوي دي.نړیوالو د بشري حقونو سازمانونو څو وارې دا ډول سزاوې «د انساني کرامت ضد» بللي او دا یې د افغانستان د نړيوالو تړنونو خلاف ګڼلي دي.ملګرو ملتونو هم په خپل وروستي راپور کې ټینګار کړی چې علني بدني مجازات باید سمدستي بند شي.سره له دغو نیوکو، طالبان لا هم په عام محضر کې د دورو د سزا عملي کولو ته دوام ورکوي او دا د «شرعي حدودو پلي کول» ګڼي.