د هرات ښار چټکه وده نوې فرصتونه او ننګونې رامنځته کړي دي

د ملګرو ملتونو د اسکان بشري پروګرام خبرداری ورکړی چې د تېرو څلوېښتو کلونو په موده کې د هرات ښار په دومره کچه پراخ شوی چې د ښار بشپړ جوړښت او بڼه یې بدله شوې ده.دغه پروګرام نن دوشنبې (د وږي ۳مه) په خپله د ایکس پاڼه کې لیکلي چې د هرات د ښار افق لا هم په پراخېدو دی، خو د چټکې ودې ترڅنګ د پام وړ ستونزې هم راټوکېدلې دي.د اسکان بشري پروګرام چارواکو ټینګار کړی چې له ۱۹۸۵ څخه تر ۲۰۲۵ پورې د هرات وده دومره پراخه شوې چې که زړور او دقیق پلان جوړونه ونه شي، د دې ودې دوام به د نفوسو ګڼې ګوڼې، ناامنه کورونو او د اساسي خدمتونو د کموالي لامل شي.دوی ویلي اوس هغه وخت رارسېدلی چې د هرات راتلونکی په موخه ییز ډول شکل ورکړل شي، څو د خلکو لپاره اقتصادي او ټولنیزې اسانتیاوې برابرې شي.هرات چې د افغانستان لوېدیځ ته پروت دی، له کابل وروسته د هېواد له مهمو لویو ښارونو شمېرل کېږي. د دې ښار چټکه ښاري وده، لکه د نورو سترو ښارونو په څېر، له ګڼو ننګونو سره مل ده. د کورونو کموالی، د اوبو محدود لاسرسی او د اساسي خدمتونو نشتون د اوسېدونکو له مهمو ستونزو ګڼل کېږي.د ملګرو ملتونو د راپور له مخې، د افغانستان له ښاري وګړو څخه له ۴۰ سلنې زیات یوازې په کابل کې ژوند کوي، هغه ښار چې له سختې د اوبو د کموالي او جدي چاپېریالي ستونزو سره لاس او ګرېوان دی.د اسکان بشري پروګرام چارواکو ټینګار کړی چې د ښاري ودې سم مدیریت او اوږدمهاله پلان جوړونه یوازینۍ لار ده چې له جدي ستونزو د مخنیوي سبب ګرځي او د میلیونونو وګړو ژوند ښه کولای شي.