د کډوالو نړیوال سازمان: له پاکستانه راستانه شویو زرګونو افغان مېرمنو سره مرسته شوې ده

د کډوالو نړیوال سازمان (IOM) اعلان کړی چې له تېر کال د نومبر میاشتې راپدیخوا یې له پنځه زره او ۶۲۷ افغان مېرمنو سره، چې له پاکستانه هېواد ته راستانه شوې دي، ملاتړ کړی دی. دغه ملاتړ د ملګرو ملتونو د ښځو له څانګې سره په نږدې همکارۍ برابر شوی دی.د یاد سازمان د چارواکو په وینا، د ملاتړ پروګرامونه روغتیایي خدمتونه، رواني مشورې او د بېرته د عادي ژوند په جوړولو کې مرسته رانغاړي.دغه مرستې هغو مېرمنو او نجونو ته نوې د بیا ژوند کولو موقع برابروي، چې د اقتصادي، امنیتي یا ټولنیزو ستونزو له امله اړ شوې وې کډوالې شي.د نړیوالو ادارو د راپورونو له مخې، له پاکستانه راستنېدونکي کسان نږدې نیمايي یې مېرمنې او نجونې دي، چې د بېرته راتګ پر مهال له ګڼو ننګونو سره مخ کېږي. ډېری یې له سرپناه، روغتیایي خدمتونو او د کار فرصتونو له کموالي ځورېږي.د ملګرو ملتونو کارپوهانو خبرداری ورکړی چې د مېرمنو او نجونو بېرته ستنېدل هغوی د امنیتي ګواښونو او هغه سختو بندیزونو سره مخامخ کوي، چې طالبان یې پر ښځو په ټولنیزو او اقتصادي فعالیتونو کې لګوي.دوی ټینګار کړی چې که پرلپسې ملاتړ او ځانګړي پروګرامونه موجود نه وي، ډېری دغه مېرمنې به د روزګار، روغتیا او زده‌کړو په برخه کې له جدي ستونزو سره مخ شي.د کډوالو نړیوال سازمان چارواکو ویلي چې د ملاتړ پروګرامونو دوام او له کورنیو او نړیوالو ادارو سره همکاري د بېرته راستانه شویو مېرمنو د توانمندۍ، امنیت او هوساینې لپاره خورا مهم رول لري.دغه پروګرامونه هڅه کوي چې مېرمنې بېرته اقتصادي او ټولنیزو فعالیتونو ته وروګرځوي او د هغوی د ژوند په بیا جوړولو کې مرسته وکړي.