له ګو‌ڼو پولو څخه د یو زرو او ۲۴۰ څخه ډېر افغان کډوالې کورنۍ بېرته راستنې شوې

د طالبانو تر ادارې لاندې رسنیزې سرچینې وایي، یوازې د تېرې یوې ورځې په ترڅ کې ۱،۲۴۵ افغانې کورنۍ د ګاونډیو هېوادونو څخه بېرته افغانستان ته ستنې شوې دي.د باختر اژانس د راپور له مخې، د افغان کډوالو د ستنېدو بهیر د سه‌شنبې په ورځ، د وږي په ۴مه، د هېواد له څو پولو څخه ترسره شوی دی.په راپور کې ویل شوي، چې ۶۴۵ کورنۍ د ننګرهار د تورخم له لارې، ۱۰۰ کورنۍ د کندهار د سپین بولډک له لارې، ۴۳ کورنۍ د نیمروز د پول ابریشم له لارې او څلور کورنۍ د پکتیکا د انګور اډې له لارې هېواد ته داخلې شوې دي.همدارنګه یوه کورنۍ د هلمند د بهرامچې له لارې او ۴۵۲ نورې کورنۍ د هرات د اسلام‌قلعې له لارې افغانستان ته راستنې شوي دي.دا په داسې حال کې ده چې یوه ورځ وړاندې هم راپورونه خپاره شوي وو، چې له زرو څخه ډېرې نورې کورنۍ، زیاتره له پاکستان او ایران څخه، افغانستان ته ستنې شوې دي.د کورنیو پرله‌پسې ستنېدل په داسې حال کې روان دي، چې ګڼ شمېر افغان کډوال په ګاونډیو هېوادونو کې له سختو فشارونو، د استوګنې له بندیزونو او د جبري ایستلو له ګواښ سره مخ دي.سره له دې چې د کډوالو د ستنېدو څپه زیاته شوې، خو د اقتصادي ستونزو، بې‌کارۍ او د کار د فرصتونو نشتون په افغانستان کې د دغو کورنیو لپاره جدي اندېښنې رامنځته کړي دي.