د بامیانو د ناروغانو له خالی جېبونو سره د طالبانو چلند

د طالبانو د بامیان ولایت مستوفیت له‌خوا یوه مکتوب د دې ولایت ولایتي روغتون ته لېږل شوی چې په کې له دولتي روغتونونو غوښتنه شوې څو له دې وروسته له ټولو ناروغانو فیس واخلي.په دې مکتوب کې ټینګار شوی چې مستوفیت اداره څو وارې په شفاهي ډول د فیس اخیستو غوښتنه کړې، خو دا ځل د بامیان د والي په مشرۍ پرېکړه شوې او د فیس ورکول لازمي بلل شوي دي.دا په داسې حال کې ده چې د بېوزلۍ ستونزه تل د دې ولایت اوسېدونکي ځوروي او ډېری خلک د ډاکتر فیس او د دوا اخیستلو وس نه لري؛ یوه موضوع چې کله ناکله د ناروغانو د مړینې لامل هم ګرځي.علي‌حسین، چې د بامیانو یو اوسېدونکی دی، د ازادۍ راډیو ته وویل: «ډیری هغه ناروغان چې دولتي روغتونونو ته ورځي، ډېر بېوزله دي، حتا د موټر د کرايې توان نه لري، نو څنګه به د ډاکتر فیس ورکړي؟» نوموړي د طالبانو دا ګام د خلکو او ناروغانو لپاره ناامېدکوونکی او له انصافه لرې وباله او د دې پرېکړې د لغو غوښتنه یې وکړه.یاده دې وي چې د افغانستان ډېری دولتي روغتونونه د روغتیا په برخه کې د نړیوالو ادارو له‌خوا تمویلېږي او ملاتړ کېږي. سره له دې، وخت ناوخت د څارونکو ادارو له‌خوا د مرستو د ضایع کېدو په اړه نیوکې هم کېږي.