ښځې د طالبانو په ستراتیژۍ کې؛ د نجونو زده‌کړې «جزئي موضوع» وبلل شوې

ذبیح‌الله مجاهد، د طالبانو ویاند، د سه‌شنبې په ورځ (د وږي ۴مه) په یوه خبري ناسته کې د دې ډلې د پنځه کلنې ستراتیژۍ د اعلان پر مهال وویل چې د نجونو د زده‌کړو موضوع د طالبانو لپاره «یوه جزئي مسأله» ده او باید بېله وڅېړل شي.هغه د خبریالانو د پوښتنو په وړاندې، چې د ښځو او نجونو د زده‌کړو ځای او موقف یې په دې ستراتیژۍ کې وپوښت، له نورو توضیحاتو ډډه وکړه او د ناستې په پای کې یې هم د ورته پوښتنې ځواب ورنه‌کړ.له هغه وخته چې طالبان بېرته پر واکمنۍ راغلي، ښځې او نجونې په منظم ډول د زده‌کړې له حقه محرومې شوې دي. لومړی د نجونو د منځنیو او لېسو دروازې وتړل شوې، وروسته پوهنتونونه او طبي انستیتیوتونه هم د هغوی پر مخ وتړل شول.دا پرېکړې په داسې حال کې شوي چې افغانستان د ښځینه کارکوونکو په ځانګړي ډول د روغتیا په برخه کې له سخت کموالي سره مخ دی.د ښځو د حقونو فعالان وایي، د طالبانو له ستراتیژۍ څخه د ښځو د زده‌کړې ایستل د دې ډلې تبعیضي او زورواکو لیدلوری څرګندوي. دوی خبرداری ورکوي چې د دې لړۍ دوام نه یوازې د افغان نجونو راتلونکی له منځه وړي، بلکې ټولنه له اړینو او مسلکي بشري سرچینو هم بې برخې کوي.