دیارلس کسان، چې دوه ښځې هم په کې شاملې دي، د طالبانو له خوا په عام محضر کې په دورو ووهل شول

د طالبانو سترې محکمې اعلان کړی چې دیارلس کسان، چې دوه ښځې هم په کې شاملې دي، د پروان او پکتیا ولایتونو په عام محضر کې په دورو وهل شوي دي.دا سزاوې د سه‌شنبې په ورځ، د وږي په ۴مه نېټه، په دوو بېلابېلو ولایتونو کې تطبیق شوې دي.د طالبانو د سترې محکمې د خبرپاڼو له مخې، دولس تنه په پروان ولایت کې د بېلابېلو تورونو په ګډون د «د واده نه بهر اړیکو» او «د نشه‌یي توکو د پیر او پلور» له امله د خلکو په وړاندې په دورو وهل شوي دي.سربېره پر دې، یو کس په پکتیا ولایت کې د غلا په تور په ورته توګه په عام محضر کې مجازات شوی دی.طالبانو ټینګار کړی چې دا کسان د دې ډلې د شرعي محکمو د پرېکړو پر بنسټ مجازات شوي دي.طالبان له هغه وخت راهیسې چې په اګست ۲۰۲۱ کې بېرته واک ته رسېدلي، څو ځلې د بدن د مجازاتو لکه دورې وهل، د غړي پرېکول او په عام محضر کې د اعدام سزاوې پلي کړي دي؛ داسې کړنې چې تل د بشري حقونو د سازمانونو او نړیوالو بنسټونو له پراخو غبرګونونو سره مخ شوي دي.ملګرو ملتونو او د بشري حقونو مدافع بنسټونو په وار وار له طالبانو غوښتي چې دغه ډول مجازات ودروي او د نړیوالو بشري حقونو معیارونو ته پابند پاتې شي.خو له دغو نیوکو سره سره، طالبان تل دا ډول مجازات د «شریعت پلي کول» بللي او هېڅکله یې له دې دریځه شاته تګ نه دی کړی.