د افغان کډوالو د ایستلو نوې څپه؛ له ایران او پاکستانه ۲.۳ میلیونه کسان بېرته ستانه شوي دي

د ملګرو ملتونو د کډوالو عالي کمیسارۍ اعلان کړی چې د روان میلادي کال په اوږدو کې له ایران او پاکستانه تر ۲.۳ میلیونو زیات افغان کډوال ایستل شوي او بېرته هېواد ته ستانه شوي دي.دغه اداره خبرداری ورکوي چې د کډوالو د دې سترې شمېرې جبري ستنېدل افغانستان له هغو لویو بشري بحرانونو سره مخامخ کړی چې په وروستیو کلونو کې یې ساری نه دی لیدل شوی.د یوې اعلامیې له مخې چې د پنجشنبې په ورځ (د وږي ۶مه) خپره شوې، دې ادارې ټینګار کړی چې نړیواله ټولنه باید په داسې شرایطو کې له افغانستانه مخ وانه ړوي، ځکه میلیونه بې‌ځایه شوي خلک اوس د عاجلو او دوامدارو مرستو اړتیا لري.د کمیسارۍ په وینا، ډېری ستنېدونکي افغانان داسې مهال هېواد ته راګرځېدلي چې نه افغانستان د هغوی د منلو امکانات لري او نه د کار او عاید زمینه ورته برابره ده. زرګونه کورنۍ په پوله ولایتونو کې بې سرپناه، بې له خوراکي توکو او د روغتیايي خدمتونو له لاسرسي بې‌برخې پاتې دي.دغه اداره خبرداری ورکوي چې که په لنډ وخت کې دې کورنیو ته بشري مرستې ونه رسېږي، روان بحران به لا ژور شي.د کډوالو عالي کمیسارۍ له مرسته کوونکو هېوادونو او نړیوالو بنسټونو غوښتي چې خپلې مالي ژمنې د افغانستان په برخه کې زیاتې کړي.یادې ادارې ویلي چې نړیواله ټولنه نه شي کولای د میلیونو انسانانو له کړاوونو سترګې پټې کړي، په داسې حال کې چې افغانستان د امنیتي، اقتصادي او ټولنیزو محدودیتونو له امله د دې سترو ستونزو د حل ظرفیت نه لري.په وروستیو میاشتو کې ایران او پاکستان په زرګونو افغان کډوال په ډلو-ډلو له خپلو خاورې ایستلي دي.د ملګرو ملتونو کډوالو اداره بیا خبرداری ورکوي چې که پراخې او بیړنۍ مرستې برابرې نه شي، د دې بحران پایلې به نه یوازې پر افغانستان، بلکې پر ټولې سیمې هم اغېز وکړي.