د اروپایي ټولنې خبرداری: کابل د اوبو له نشتوالي د بې‌اوبو ښار په لور روان دی.

د افغانستان لپاره د اروپايي ټولنې دفتر د نړېوالې اوبو د اونۍ په پای کې د هېواد د اوبو د کموالي په تړاو خپله ژوره اندېښنه څرګنده کړې او ټینګار یې کړی چې د دې بحران پر وړاندې د همکارۍ لپاره چمتو دی.په هغه اعلامیه کې چې د پنجشنبې په ورځ (د وږي۶مه) خپره شوې، د اروپايي ټولنې دفتر لیکلي:«د اوبو د نړېوالې اونۍ په پای کې زموږ فکرونه له د افغانستان له خلکو سره دي. د اوبو کموالی، په ځانګړې توګه په کابل کې، یوه حیاتي ستونزه ده چې له خوراکي خوندیتوب نیولې تر عامې روغتیا پورې پر هر څه مستقیمه اغېزه لري.»یاد دفتر زیاته کړې چې اروپايي ټولنه ژمنه ده له محلي بنسټونو او شریکانو سره د همکارۍ له لارې د وچکالۍ او د اوبو د کمښت اغېزې راکمې کړي. د اروپايي ټولنې پروګرامونه د اقلیمي بدلونونو سره د برابرېدو لارې، د کرنې ملاتړ، د عامې روغتیا پیاوړتیا او د بې‌ځایه شویو او بېرته ستنو شویو لپاره د خوراکي خوندیتوب برابرول رانغاړي.په اعلامیه کې همدارنګه راغلي:«دا یو ګډ مسوولیت دی. موږ غواړو یو رغنده بحث پیل کړو څو له اوبو څخه تر ټولو ښه ګټه واخلو او د راتلونکو نسلونو لپاره یو باثباته راتلونکی جوړ کړو.»افغانستان په وروستیو کلونو کې له پرله‌پسې وچکالۍ سره مخامخ شوی او دا بحران په ځانګړې توګه د سترو ښارونو لکه کابل کې ډېر محسوس شوی دی.کارپوهان خبرداری ورکوي که اوسنی وضعیت همداسې روان وي، کابل به په راتلونکو پنځو کلونو کې د یوې داسې ښار په توګه له جدي خطر سره مخ شي چې د دوامدارو اوبو د لاسرسي توان به ونه لري.د اوبو کموالی نه یوازې د خلکو ورځنی ژوند ګډوډ کړی، بلکې د هېواد د کرنې، روغتیا او خوراکي خوندیتوب لپاره هم یوه جدي ګواښ بلل کېږي.