ملګري ملتونه او نړیوال چارواکي د کنړ د زلزلې له قربانیانو ملاتړ کوي

ملګرو ملتونو او نړیوالو چارواکو د تېرې شپې د کنړ ولایت د زورورې زلزلې په غبرګون کې د بیړنیو مرستو د رسولو خبر ورکړی او د بشري تلفاتو په اړه یې خپله ژوره اندېښنه څرګنده کړې ده.ریچارد بینټ، په افغانستان کې د ملګرو ملتونو ځانګړي استازي، په «اېکس» کې لیکلي: «د کنړ د ویجاړوونکې زلزلې د خبر په اورېدو زړونه مو د قربانیانو کورنیو او زیانمنو ټولنو سره دي. د ژغورنې ټیمونو لپاره د ځواک او بریا هیله لرم.»ملګرو ملتونو په خپل رسمي پیغام کې ویلي چې د دې سازمان د مرستو او ژغورنې ډلې د زیانمنو سیمو ته رسېدلي او بیړني ګامونه یې د مرستو د برابرولو او د خلکو د ملاتړ لپاره پیل کړي دي. په پیغام کې ویل شوي: «زموږ فکرونه له زیانمنو ټولنو سره دي او د هغوی د کړاو د کمولو لپاره به هر ډول هڅه وشي.»دغه زلزله په ختیځ افغانستان کې سلګونه کسان مړه او ټپیان کړي او د کورونو او بنسټیزو تاسیساتو پراخ ویجاړې یې رامنځته کړي دي.ځایي او نړیوال چارواکي خبرداری ورکوي چې د قربانیانو شمېر ښايي لا ډېر شي او د بیړنیو مرستو رسېدل خورا مهم دي. راپورونه ښيي چې د کنړ ولایت د وټه‌پور، مانګي، چپه‌دره، څوکۍ او نورګل ولسوالۍ تر ټولو زیات زیانمنې شوې دي او ګڼ کسان لا هم د خټو لاندې بند پاتې دي.ملګرو ملتونو او نړیوالو استازو غوښتنه کړې چې زیانمنو سیمو ته دې بېړنۍ بشري مرستې ولېږل شي.