انتونیو ګوترش د کنړ زلزلې له قربانیانو سره خواخوږي څرګنده کړه

د ملګرو ملتونو سرمنشي انتونیو ګوترش د تېرې شپې د ختیځ افغانستان مرګونې زلزلې له قربانیانو او د هغوی له کورنیو سره خواخوږي ښودلې ده.ګوترش په خپل پیغام کې چې د «اېکس» ټولنیزې شبکې له لارې خپور شوی، د وژل شویو کورنیو ته خپل ژور خواخوږی وړاندې کړي او د ټپیانو لپاره یې د ژر رغېدو هیله کړې ده.هغه ټینګار کړی چې د ملګرو ملتونو د مرستو ډلې په افغانستان کې بسیج شوي او هڅې کوي چې زیانمنو سیمو ته بیړنۍ مرستې ورسوي.د طالبانو د کنړ ولایت د طبیعي پېښو د مخنیوي ریاست چارواکو ویلي چې د وروستیو شمېرو له مخې، په دې زلزله کې له ۷۰۰ ډېر کسان وژل شوي او له زرو ډېر نور ټپیان دي.خلک او د ژغورنې ډلې لا هم د مرستې په هڅو بوخت دي، او نړیوالو سازمانونو اعلان کړی چې د زیانمنو سیمو د مرستې په لاره کې به هېڅ ډول کمي و نه کړي.