د ملګرو ملتونو سرمنشي د ختیځ افغانستان د زلزله‌ځپلو لپاره د لا ډېرو مرستو غوښتنه وکړه

د ملګرو ملتونو سرمنشي، انتونیو ګوترش، د ختیځ افغانستان د وروستۍ زلزلې د درنو تلفاتو او ویجاړیو له امله د ژورې خواخوږۍ د څرګندولو تر څنګ له نړیوالې ټولنې غوښتي چې د زیانمنو شویو خلکو لپاره زیاتې مرستې ځانګړې کړي.په هغه بیان کې چې د چهارشنبې په ورځ (د وږي ۱۲مه) د ملګرو ملتونو د مرستندوی دفتر (یوناما) له لوري خپور شو، ګوترش ویلي دي چې ملګري ملتونه به په دغو سختو حالاتو کې د افغانستان له خلکو د ملاتړ هېڅ فرصت له لاسه ورنکړي.هغه ټینګار کړی چې اوسني منابع د زلزله‌ځپلو د پراخو اړتیاوو د پوره کولو لپاره کافي نه دي او باید په بیړني ډول نوې مرستې برابرې شي.سرمنشي د ګڼ شمېر افغانانو د مرګ له امله د ژورې خواشینۍ په څرګندولو سره زیاته کړې چې ملګري ملتونه د افغانستان له مسؤلو ادارو او نړیوالو شریکانو سره په همغږۍ د اړتیاوو د ارزونې او د عاجلو مرستو د برابرولو بهیر پیل کړی دی.په همدې حال کې د ملګرو ملتونو د بشري مرستو د همغږۍ دفتر (اوچا) اعلان کړی چې د بیړنیو مرستو د پیل لپاره ۱۰ میلیونه ډالر ځانګړي شوي دي.د دې پرېکړې له مخې، پنځه میلیونه ډالر د «مرکزي اضطراري صندوق» او پنځه میلیونه نور د «افغانستان د بشري مرستو صندوق» له لارې برابرېږي.اوچا همداراز ویلي چې له هېوادونو او نورو مرستندویو سره اړیکې روانې دي او تمه ده په راتلونکو ورځو کې نورې مرستې هم اعلان شي.تازه زلزله چې د شپې پر یکشنبه د ۶ ریشتر په کچه وه، د ختیځ ولایتونه، په ځانګړي ډول ننګرهار، ولړزاوه.د طالبانو د پرونۍ اعلامیې له مخې، په دې پېښه کې لږ تر لږه ۱،۴۱۱ تنه وژل شوي، له درې زرو او ۱۲۴ ډېر کسان ټپیان شوي او له پنځه زره او ۴۰۰ ډېر کورونه نړېدلي دي.