د کنړ د زلزلې د قربانیانو شمېر له ۱،۴۵۰ کسانو واوښت

د طالبانو چارواکي وایي چې د کنړ د مرګونې زلزلې د تلفاتو شمېر یو ځل بیا زیات شوی دی.حمدالله فطرت، د طالبانو د ویاند مرستیال، د چهارشنبې په ورځ (د وږي ۱۲مه) په یوه خبرپاڼه کې ویلي چې د وژل شویو کسانو شمېر ۱،۴۵۷ ته رسېدلی او د ټپیانو شمېر هم ۳،۳۹۴ ته لوړ شوی دی.یوه ورځ مخکې طالبانو په رسمي ډول د ۱،۴۱۱ وژل شویو او ۳،۱۲۴ ټپیانو راپور ورکړی و.یاده زلزله چې په وروستیو ورځو کې د کنړ ولایت او د ختیځ افغانستان یو شمېر سیمې ولړزولې، درانه زیانونه یې اړولي دي. ګڼ کورونه ویجاړ شوي او زرګونه کورنۍ بې‌سرپناه شوې دي.د طالبانو سیمه‌ییز چارواکي وايي، د موندنې او ژغورنې عملیات لا هم روان دي او کېدای شي د تلفاتو شمېر نور هم زیات شي. د سختو لارو او د مرستو د وسایلو کمښت د مرستندویانو هڅې له ستونزو سره مخ کړې دي.دغه پېښه دننه او بهر پراخ غبرګونونه هم راپارولي دي. نړيوالو سازمانونو او یو شمېر هېوادونو ژمنه کړې چې له زلزله‌ځپلو سره به بیړنۍ مرستې واستوي.