په یوه ورځ کې زرګونه د افغان کډوالو کورنۍ هېواد ته ستنې شوې

د طالبانو رسمي سرچینو ویلي چې پرون زرګونه افغان کډوال بېرته هېواد ته راستانه شوي دي. د راپورونو له مخې، د ستنېدونکو کورنیو شمېر ۲۷۲۸ کورنیو ته رسېدلی دی.د طالبانو واکمني لاندې باختر خبري آژانس د راپور پر بنسټ، ډېری کورنۍ د بېلابېلو پولو له لارې هېواد ته دننه شوي دي. په دغو کې ۱۷۰۰ کورنۍ د ننګرهار له تورخم، ۱۵۶ کورنۍ د کندهار له سپین‌بولدک، ۱۵۱ کورنۍ د نیمروز له پل ابریشم، ۱۱ کورنۍ د هلمند له بهرامچې او ۷۱۰ کورنۍ د هرات له اسلام‌قلعه څخه افغانستان ته دننه شوي دي.مخکې له دې، په تېرو دوو ورځو کې هم نږدې درې زره کورنۍ بېرته ستنې شوې وې، چې د افغان کډوالو د ستنېدو د مخ په زیاتېدو بهیر ښيي.چارواکي وايي چې د دې بهیر په دوام کې د پولو مسیرونه او د کډوالو د منلو امکانات له ننګونو سره مخ شوي او لا زیاتو همغږۍ او ملاتړ ته اړتیا لیدل کېږي.