استرالیا د کنړ د زلزله‌ځپلو لپاره یو میلیون ډالر ځانګړي کړ

د ملګرو ملتونو د بشري مرستو د همغږۍ دفتر (اوچا) اعلان کړی چې د استرالیا حکومت پرېکړه کړې یو میلیون ډالر د کنړ د وروستي زلزلې له زیانمنو سره د مرستو لپاره ځانګړي کړي.اوچا د پنجشنبې په ورځ (د وږي ۱۳مه) په خپل خبرپاڼه کې ویلي چې دغه پیسې به د «افغانستان د بشري مرستو صندوق» ته ولېږل شي، څو مرستې په چټک او اغېزمن ډول اړمنو کسانو ته ورسېږي.په خبرپاڼه کې خبرداری ورکړل شوی چې وروستۍ زلزله په افغانستان کې روان بشري ناورین لا پسې ژور کړی، داسې ناورین چې مخکې یې د هېواد نیمایي وګړي د بیړنیو مرستو اړ کړي وو.د استرالیا حکومت ټینګار کړی چې دغه مرستې به د ملګرو ملتونو له لارې وېشل کیږي، څو ډاډ ترلاسه شي چې د طالبانو لاس ته ونه رسېږي او مستقیم د زیانمنو خلکو لاس ته ورسېږي.استرالیا یادونه کړې چې له ۲۰۲۱ کال راهیسې یې د افغانستان د کړکېچونو د هواري لپاره تر ۲۶۰ میلیونو ډالرو ډېره مرسته، په ځانګړي ډول د ښځو او نجونو د ملاتړ په برخه کې کړې ده.کارپوهان وايي دا نوې مرسته به د خوراکي توکو، بیړنیو سرپناهونو او طبي خدمتونو د برابرولو لپاره مهم ګام وي.وروستیو زلزلو په کنړ او ننګرهار کې پراخ زیانونه اړولي، سلګونه کسان یې وژلي او زرګونه کورنۍ یې بې‌کوره کړې دي. ملګرو ملتونو خبرداری ورکړی چې که بیړنۍ مرسته ونه شي، د لا لوی بشري ناورین د رامنځته کېدو خطر شته.