دیلي میل: د طالبانو بندیزونه د زلزله‌ځپلو ښځو ژوند واخیست

د افغانستان په ختیځ کې د وروستیو درې مرګ‌ژونکو زلزلو وروسته، راپورونه ښيي چې یو شمېر ښځې د طالبانو د سختو بندیزونو له امله د ژغورنې چانس له لاسه ورکړی او تر خاورو لاندې ژوند له لاسه ورکړی دی.د بریتانیا دیلي‌میل ورځپاڼې د شنبې په ورځ، د وږي ۱۵مه، په یوه راپور کې لیکلي چې ژغورونکو او د پېښې ژوندي پاتې شویو له طالبانو څخه د ژغورنې د عملیاتو پر مهال د خنډونو خبره کړې ده.د دوی په وینا، طالبانو نارینه ژغورونکو ته اجازه نه ده ورکړې چې ښځو ته لاس ورکړي، او په عین حال کې، ښځینه مرستندویانې هم له سیمې منع شوي وې.یوه ژوندي پاتې شوې ښځه، چې له خبریالانو سره‌یې خبرې کړې، ویلي:«موږ‌ یې شا ته کړلو او یوازې نارینه‌ یې درملنې ته وړل. موږ په وینو کې لمبو، خو هېڅوک مرسته ته رانژدې نه شو.»دا ډول روایتونه یو ځل بیا د طالبانو د محدودوونکو پالیسو د خطرناکو پایلو په اړه اندېښنې زیاتې کړي دي.د بشري حقونو سازمانونو تر دې مخکې خبرداری ورکړی و چې دا ډول بندیزونه نه یوازې د ښځو ورځنی ژوند له ستونزو سره مخ کوي، بلکې په بحراني حالاتو لکه زلزله کې، نيغ په نيغه د دوی د ژوند په قیمت تمامېږي.د وروستیو زلزلو له امله چې د افغانستان څو ختیځ ولایتونه‌یې ولړزول، سلګونه کسان وژل شوي او زرګونه نور ټپیان شوي دي. اوس، د طالبانو له بندیزونو څخه راولاړې شوې ستونزې د دې ناورین بڼه لا پراخه کړې ده.