د ویانا مېشت نړیوال صندوق استازې: په افغانستان کې د نشه‌يي توکو بحران او د ښځو ځپل، نړیوال امنیت ته ګواښ دی

په ویانا کې د “UBDC” نومې نوې نقشې لارې د معرفي غونډې پر مهال، د دغه ښار د نړیوال صندوق استازې نانه‌جا بوفته د طالبانو له سیاستونو کلکه نیوکه وکړه او ویې ویل، د طالبانو هغه ادعا چې ګواکي د نشه‌يي توکو تولید یې ختم کړی، «په جدي ډول باید تر پوښتنې لاندې ونیول شي».هغې وویل، که څه هم په افغانستان کې د تریاکو کر کم شوی، خو د مصنوعي مخدره توکو لکه مت‌امفیتامین تولید په پراخ ډول زیات شوی او نوې قاچاقي شبکې یې رامنځته کړي چې دا چاره د نړیوال امنیت لپاره خطرناکه ده.نانه‌جا بوفته زیاته کړه: «میلیونونه افغانان، چې په کې ښځې او ماشومان هم شامل دي، له اعتیاده کړېږي. طالبان د زور او تاوتریخوالي له لارې هڅه کوي چې معتادان د نشې پرېښودو ته اړ کړي، خو دا طریقه اغېزناکه نه ده.»هغې د طالبانو د جګړې ماشین او د نشه‌يي توکو له قاچاق سره‌یې د تړاو موضوع د بشري حقونو او نړیوال امنیت لپاره یو لوی ګواښ وباله.بوفته ټینګار وکړ: «د ښځو سیسټماتیک ځپل دوام لري، او دا چاره د یوه پایدار سولې امکان له منځه وړي.»هغې وویل، یوازینی دوامداره حل د یوه ټول‌شموله او نماینده حکومت جوړول دي، داسې حکومت چې د هر افغان اساسي حقونه تضمین کړي.نانه‌جا بوفته زیاته کړه:«یوه باثباته او امن افغانستان ته رسېدل یوازې د عدالت، برابري او حساب‌ورکولو له لارې ممکن دي، نه د سرکوب او ناقانونه شبکو له لارې.»هغې طالبان ته په اشاره وویل:«هر ډول سپین‌ کاري یا مشروعیت‌ بخښنې د طالبانو لپاره هم ګټه نه لري، او اړتیا ده چې د امنیت او ثبات لپاره یوه هوښیارانه او ستراتیژیکه تګلاره غوره شي.»د خبرو په پای کې، بوفته یوه نیوکه وکړه او د ملګرو ملتونو د ځانګړې استازې، رزا اوتونبایوا ته یې مخ واړاوه او پوښتنه‌یې وکړه: «ایا ممکنه ده چې ریښتینی امنیت او سوله، پرته له عدالت او برابري تعریف شي؟ ولې تل امنیت له بشري حقونو جلا ګڼئ؟»په افغانستان کې د ښځو پر فعالیتونو سخت بندیزونه، او د ټول‌شموله حکومت نشتوالی، لا هم د هېواد له تر ټولو لویو سیاسي او ټولنیزو ستونزو څخه شمېرل کېږي.