متحده عربي امارات د افغانستان ختیځ زلزله‌ ځپلو سره مرسته وکړه.

متحده عربي امارات اعلان کړی دی چې د دغه هېواد د ګډو عملیاتو د قوماندې ټیم لا هم خپله بشري مأموریت د افغانستان په ختیځ کې د وروستیو زلزله‌ ځپلو سره د مرستې لپاره دوام ورکوي.یاد ټیم د امارات د سرې میاشتې ټولنې په همکارۍ، او د «امارات اېډ» هوایي پل په چوکاټ کې، لسګونه ټُنه خوراکي توکي، درمل، طبي وسایل او بیړني خېمې د کنړ ولایت ته ولیږل، او یوه برخه یې بې‌ځایه شویو کورنیو ته وېشل شوې ده.د رسمي سرچینو په وینا، دا مرستندویه مأموریت د اماراتو د ولسمشر، شیخ محمد بن زاید آل‌نهیان، په مستقیم امر پیل شوی، او د ابوظبۍ د ملکي دفاع ځواکونو، ملي ګارد، او روغتیايي ټیمونو غړي په کې شامل دي. دغه ټیم تېرې چهارشنبې افغانستان ته رسیدلی او له هماغه وخت راهیسې، بې‌ له دمې د ژغورنې او مرستې په فعالیتونو بوخت دی.متحده عربي امارات لومړی هېواد دی چې د دې وژونکو زلزلو وروسته یې عملاً د ژغورنې ټیم او عاجلې مرستې افغانستان ته لېږلي دي، په داسې حال کې چې ځینې هېوادونه لا هم د مرستې لارو چارو د ارزونې په حال کې دي، امارات د زیانمنو خلکو ځینې عاجلې اړتیاوې پوره کړې دي.د امارات چارواکو ټینګار کړی چې دا عملیات به تر هغو دوام ولري څو پورې چې د زلزله‌ ځپلو سیمو بشري وضعیت باثباته شي، او زیاتې مرستې هم د لېږد پلان کې دي.