له دوه زره زیاتې کډوالې کورنۍ په یوه ورځ افغانستان ته راستنې شوي

د طالبانو د کډوالو او بېرته راستنېدونکو چارو وزارت د تازه شمېرو پر بنسټ، پرون (شنبه، د وږي ۱۵مه) له دوه زره څخه زیاتې افغانۍ کورنۍ چې ډېری یې له پاکستان او ایران څخه ایستل شوې وې، هېواد ته ستنې شوې دي. دا لړۍ د ګاونډیو هېوادونو د کډوالو د ایستلو د تګلارو په دوام روانه ده.د طالبانو د معلوماتو له مخې، د راستنېدلو له ډلې شاوخوا ۱۴۹۲ کورنۍ د تورخم، سپین‌بولدک او بهرامچې له پولو افغانستان ته دننه شوې دي.همدارنګه، نږدې ۶۴۵ نورې کورنۍ د اسلام‌قلعه او د پل ابریشم له لارې د ایران نه هېواد ته ستنې شوې دي.د طالبانو د کډوالو وزارت چارواکو ویلي، د راستانه شویو کورنیو د منلو او ثبت بهیر د سیمه‌ییزو چارواکو او مرستندویو ادارو په همکارۍ روان دی څو د دوی لومړنۍ اړتیاوې لکه اوسیدو ځای، خوراک او روغتیايي خدمتونه برابر شي.دا ستنېدنې په داسې حال کې دي چې زرګونه افغان کډوال په پاکستان او ایران کې د ایستلو له فشار سره مخ دي او اندېښنې د دوی د انساني وضعیت او د افغانستان د منلو وړتیا په اړه ورځ تر بلې ډېرېږي.نړیوال کارپوهان باور لري چې د کډوالو د ایستلو دوام کولای شي پر سرحدي سیمو او لویو ښارونو نور ټولنیز او اقتصادي فشارونه هم زیات کړي.