د ملګرو ملتونو د ښځو څانګه: په افغانستان کې د میندو د مړینې کچه لوړه شوې ده

د ملګرو ملتونو د ښځو دفتر په افغانستان کې د میندو د روغتیا او د ښځو د حقونو د خراب وضعیت په اړه اندېښنه څرګنده کړې ده.یاد بنسټ په یوه راپور کې چې نن (یک‌شنبه، د وږي ۱۶مه) خپور شوی، ټینګار کړی چې له څلورو کلونو وروسته د طالبانو د واکمنۍ، د ښځو وضعیت د روغتیا او بنسټیزو خدمتونو ته د لاسرسي په برخه کې لا هم بحراني دی.د راپور له مخې، د میندو د مړینې کچه په هېواد کې مخ پر زیاتېدو ده او ستره اندېښنه د تنکیو نجونو د ولادت موضوع ده چې زیاتره د وخت نه مخکې ودونو له امله رامنځته کېږي.د ملګرو ملتونو کارپوهانو خبرداری ورکړی چې د ماشومانو ودونه او په کم عمر کې امیندوارۍ افغان ښځې او نجونې له جدي فزیکي او رواني خطرونو سره مخ کوي، او د هېواد روغتیايي سیستم د پوره ځواب ویلو توان نه لري.ملګرو ملتونو له نړیوالې ټولنې غوښتنه کړې چې د ښځو د حقونو د ملاتړ او د میندو د مړینې د کمولو لپاره بېړني ګامونه او پراخې مرستندویه پروګرامونه په افغانستان کې پیاوړي کړي.د میندو د مړینې زیاتوالی او د ماشومانو وخت نه مخکې ودونه، د نجونو تر څنګ د کورنیو او ټولنې لپاره پراخې ټولنیزې ستونزې راولاړوي او د بشري حقونو جدي اندېښنې هم زېږوي.