بې‌ پولې خبریالان: افغان خبریالان د طالبانو تر فشار لاندې د بېړني نړیوال ملاتړ اړتیا لري

د بې‌پولې خبریالانو سازمان (RSF) په خپل تازه اعلان کې خبرداری ورکړی چې طالبان په منظم ډول په افغانستان کې خبریالان او د رسنیو کارکوونکي په نښه کوي او د هغوی ژوند او ازادي له جدي ګواښ سره مخ ده.یاد بنسټ له درېیمو هېوادونو غوښتي چې د افغان خبریالانو د خوندیتوب لپاره عملي ګامونه ترسره کړي.مارتین رو، د بې‌پولې خبریالانو د بحران څانګې مشر، په یوه خبري ناسته کې ویلي چې افغان خبریالان، که په هېواد کې دي او که په جلاوطنۍ کې، هره ورځ له ګواښونو لکه ګواښول، نیولو، ځپنل او ان د غچ اخیستنې له خطر سره مخ دي.د هغه په وینا، د طالبانو فشارونه نه یوازې د وینا آزادي له منځه وړي، بلکې د خبریالانو مسلکي ژوند یې فلج کړی دی.نوموړي ټینګار کړی چې د نړۍ هېوادونه باید د افغان خبریالانو د ایستلو یا بېرته استولو پر وړاندې بې‌ پروا پاتې نه شي.هغه زیاته کړه: «د ویزو ورکول او د ملاتړ زمینه برابرول تر ټولو لږ څه دي چې نړیواله ټولنه یې د افغان خبریالانو د ژغورلو لپاره کولی شي.»د بې‌پولې خبریالانو په باور، د طالبانو له بیا واکمنېدو وروسته د افغانستان د رسنیو وضعیت خورا خراب شوی دی. ګڼ شمېر خپلواکې رسنۍ تړل شوې یا محدودې شوې او ډېر خبریالان اړ شوي له هېواده وتښتي. سره له دې، هغه کسان چې لا هم په افغانستان کې پاتې دي، هره ورځ له ګواښونو او فشارونو سره مخ دي.دغه د رسنیو د آزادۍ مدافع سازمان ټینګار کړی چې د مطبوعاتو آزادي د نړیوالې ټولنې له بنسټیزو ارزښتونو څخه ده او افغان خبریالان د طالبانو تر ګواښونو پرېښودل، د وینا د آزادۍ او د معلوماتو د لاسرسي پر وړاندې د ګډې نړیوالې مسئولیت سترګې پټول دي.بې‌ پولې خبریالانو یو ځل بیا له حکومتونو او نړیوالو بنسټونو غوښتنه کړې چې افغان خبریالان یوازې پرې نږدي او د حمایوي پروګرامونو په جوړولو سره د هغوی لپاره د خوندي ژوند او مسلکي کار دوام په بهر کې برابر کړي.