د اروپايي ټولنې اعلان: د افغان ښځو ملاتړ زموږ لومړيتوب دی

اروپايي ټولنې ويلي چې ۱۴ ميليونه يورو يې د افغانستان د ټولنيز زغم د پياوړتيا او د ښځو او ماشومانو د ملاتړ لپاره ځانګړي کړي دي. دغه مرستې به د ملګرو ملتونو اړوندو بنسټونو له لارې ولګول شي.د يکشنبې (د وږي ۱۶مه) په خبرپاڼه کې راغلي چې له دې مرستو څخه شپږ ميليونه يورو د «د افغانستان ټولنيز زغم پروګرام» د پلي کولو لپاره ځانګړي شوي، څو د کړکېچونو پر وړاندې د ځپلو ټولنو وړتيا لوړه شي او د کورنيو د ژوند د ښه والي لاره هواره شي.همدارنګه، اته ميليونه يورو د ملګرو ملتونو د ښځو څانګې ته سپارل کېږي، څو د افغان ښځو او نجونو د ملاتړ لپاره ولګول شي. دا مرسته به د ټولنيزو خدمتونو برابرول، زده‌کړې، د بنسټيزو سرچينو ته لاسرسی او د ښځو د ټولنيز ګډون د فرصتونو په برابرولو کې ولګول شي.اروپايي ټولنې ټینګار کړی چې د افغانستان د اوسني کړکېچ له امله ښځې او ماشومان تر ټولو زيات له ګواښونو سره مخ دي او اړينه ده چې مرستې په مؤخه ييزه توګه همدې قشرونو ته ورسېږي.