په ملګرو ملتونو کې د افغانستان د استازولۍ سرپرست: طالبان پخواني پوځيان په نښه کوي او وژني

نصيراحمد فايق، د افغانستان د استازولۍ سرپرست په ملګرو ملتونو کې، د طالبانو له لوري د پخوانيو امنيتي ځواکونو «موخه ییزې وژنې» په اړه خبرداری ورکړی دی.فايق د دوشنبې په ورځ (د وږي ۱۷مه) په خپله د ایکس ټولنيزې شبکې پاڼه کې ليکلي، کافي اسناد او شواهد شته چې طالبان د تېر حکومت پر پوځیانو د نيولو، ځپنې او وژنو لړۍ روانه کړې ده.هغه دا کړنې «د بشريت پر ضد جنايت» بللی او له نړيوالې ټولنې يې د جدي پاملرنې غوښتنه کړې ده.دا څرګندونې په داسې حال کې کېږي چې د راپورونو له مخې، طالبانو تازه د پخواني پوځ دوه لوړپوړي قوماندانان نيولي دي. که څه هم تر اوسه د دوی د هويت او برخليک په اړه ډېر جزئيات نه دي خپاره شوي، خو د کورنيو نږدې سرچينو ويلي، د هغوی د برخليک په اړه ژورې اندېښنې شته.فايق زياته کړې، د طالبانو دا چلند د هغو ژمنو خلاف دی چې دوی د ۲۰۲۱ کال له بيا واکمنېدو وروسته کړې وې. هغه يادونه کړې چې طالبانو د واکمنۍ په لومړيو مياشتو کې د «عمومي عفوې» اعلان کړی و، خو په عمل کې د پخوانيو پوځیانو د نيولو، ځپنې او موخه ييزو وژنو پېښې ورځ تر بلې زياتېږي.تر دې وړاندې هم د بشري حقونو بنسټونو په وار وار راپورونه ورکړي چې طالبانو، د عمومي عفوې له اعلان سره سره، لسګونه د پخوانيو امنيتي او دفاعي ځواکونو غړي نيولي او يا په مرموز ډول وژل شوي دي.ملګرو ملتونو هم په څو رسمي راپورونو کې دغه برخې ثبت کړي او د دوام په اړه يې اندېښنه څرګنده کړې ده.