د ښځو د عدالت‌ پالو غورځنګ: طالبانو د بدخشان په فيض‌ اباد پر لاره يوه ښځه ټپي کړه

د ښځو د عدالت‌ پالو غورځنګ په وينا، پرون يوه ښځه د بدخشان په فيض‌اباد پر لاره د طالبانو له لوري په سخت ډول ووهل شوه او اوس مهال په روغتون کې بستر ده.د راپور له مخې، دغه مېرمن د طالبانو پر بندیزونو اعتراض کړی و. د طالبانو سرتېرو هغه له موټره ښکته کړه او په زور او تاوتريخوالي يې ووهله.د ښځو د عدالت‌ پالو غورځنګ ټينګار کړی چې دا پېښه د طالبانو د ځپنې او ذهني وېرونې د تګلارې څرګند مثال دی او د ښځو د انساني حقونو او د ژوند د حق ښکاره نقض بلل کېږي.د ښځو د حقونو فعالانو خبرداری ورکړی چې د داسې چلند دوام به بنسټيزې ازادۍ کمزورې کړي او په ټولنه کې به وېره او ناامنۍ زياتې کړي. هغوی له نړيوالو او مدني بنسټونو غوښتنه کړې چې دا کړنې وغندي.د معترضو ښځو په باور، دا پېښه يو ځل بيا څرګندوي چې د طالبانو پر تاوتريخوالي د ښځو مقاومت سره له درنو لګښتونو لا هم روان دی او ښځې پرېکړه کړې چې د خپل ژوند حق او د انساني کرامت ارزښت وغواړي.