د روغتیا نړېوال سازمان: باید د ښځینه مرستندویانو پر کار بندیزونه لېرې شي

د روغتیا نړېوال سازمان له طالبانو غوښتي چې د ښځینه مرستندویانو پر کار او تګ راتګ بندیزونه پای ته ورسوي او هغوی ته اجازه ورکړل شي چې له نارینه سرپرست پرته سفر وکړي او د افغانستان د ختیځ وروستي زلزلې زیانمنو ته روغتیايي خدمتونه وړاندې کړي.دغه غوښتنه د وږي په ۱۷مه د دې سازمان د استازي مرستیالې موکتا شرما له لوري شوې ده. هغې ویلي، د ښځینه روغتیايي کارکوونکو نشتوالی په زیانمنو سیمو کې د مرستو بهیر سخت ګډوډ کړی دی.د نوموړې په وینا، اوس مهال په زیانمنو سیمو کې نږدې ۹۰ سلنه روغتیايي پرسونل نارینه دي او یوازې ۱۰ سلنه ښځې دي چې زیاتره یې نرسانې، نه د ځانګړو مهارتونو لرونکې ډاکترانې دي.د روغتیا نړېوال سازمان ټینګار کړی چې د ښځینه ډاکترانو په نه شتون کې ډېری زیانمنې ښځې یا د کلتوري بندیزونو له امله نارینه ډاکترانو ته نه ورځي او یا هم د سفر توان نه لري، چې له امله یې د بېړنیو خدمتونو له ترلاسه کولو محرومې پاتې کېږي.په وروستي شپږ ریشتره زلزله او پرلپسې لړزو کې له ۲۲۰۰ زیات کسان مړه شوي، شاوخوا ۳۶۰۰ تنه ټپیان دي او زرګونه کورنۍ بې‌سرپناه شوې دي.افغانستان له ۲۰۲۱ کال وروسته، له نړیوالو مرستو د پام وړ کموالي او له بشري کړکېچونو سره مخ دی. پر ښځو د کار او زده‌کړې بندیزونه نه یوازې د خلکو ورځنی ژوند اغېزمن کړی، بلکې د بیړني حالت په څېر د وروستي زلزلې پر مهال یې د مرستو بهیر هم محدود کړی دی.