د ملګرو ملتونو د بشري حقونو عالي کمېشنر: افغانستان د میندو د مړینې له لوړې کچې سره مخ دی

د ملګرو ملتونو د بشري حقونو عالي کمېشنر، ولکر ترک، خبرداری ورکړی چې افغانستان د طالبانو د بندیزونو له امله اوس د نړۍ له هغو هېوادونو څخه دی چې د میندو د مړینې تر ټولو لوړه کچه لري. ترک دا څرګندونې نن دوشنبې (د وږي ۱۷مه) د بشري حقونو د شورا د شپږم پړاو پرانیست غونډه کې په جنیوا کې وکړې.نوموړي وویل چې د طالبانو تګلارې نه یوازې د ښځو بنسټیز حقونه تر پښو لاندې کړي، بلکې د هغوی ژوند یې له جدي ګواښ سره مخ کړی دی.د هغه په وینا، د ښځو پر روغتیايي خدمتونو د بندیزونو لګول د میندو او ماشومانو لپاره سترې ستونزې رامنځته کړې دي.ولکر ترک ټینګار وکړ چې د ښځو د حقونو نقض په افغانستان کې د نړۍ له تر ټولو اندېښمنو بشري کړکېچونو څخه دی.هغه زیاته کړه چې د طالبانو له بیا واکمنېدو څلور کاله وروسته، ښځې او نجونې له ټولنیز ژوند څخه په سیستماتیک ډول نږدې بشپړې ایستل شوې دي.د بشري حقونو عالي کمېشنر له نړیوالې ټولنې وغوښتل چې د افغان ښځو او نجونو د حقونو د خوندیتوب لپاره بې‌ پروا پاتې نه شي او اغېزمن ګامونه پورته کړي.