ریچارد بېنټ: د طالبانو د عادي‌ کېدو خطر جدي دی

ریچارد بېنټ، د ملګرو ملتونو د افغانستان د بشري حقونو ځانګړي راپور ورکوونکي، د هېواد د اوسني وضعیت په اړه په ژوره اندېښنه سره ویلي چې نړیواله ټولنه باید اجازه ور نه کړي طالبان ورو ورو د یوه عادي واقعیت په توګه ومنل شي.هغه د دوشنبې په ورځ (د وږي ۱۷مه) د ملګرو ملتونو د بشري حقونو د شورا په غونډه کې د افغانستان په اړه په خبرو کې خبرداری ورکړ چې د ده موندنې او د نورو ادارو راپورونه «د افغانستان د بشري حقونو د خراب وضعیت یوه روښانه او ثابته انځورګري» وړاندې کوي.بېنټ څرګنده کړې چې اوس مهال ځینې هېوادونه افغانستان «یوه له لاسه وتلې قضیه» بولي، ځکه باور لري چې طالبان پر هېواد بشپړ واک لري او بل عملي بدیل نشته.هغه زیاته کړه چې دا لیدلوری د طالبانو د عادي‌کېدو خطر زیاتوي او معنا یې دا ده چې د پراخو بشري حقونو له نقض څخه سترګې پټې شي.د ملګرو ملتونو ځانګړي راپور ورکوونکي ټینګار وکړ چې پر ښځو او نجونو د سختو بندیزونو لګول، د وینا د آزادۍ ځپل او د عدالت نشتوالی په افغانستان کې هغه مسایل دي چې نړیواله ټولنه باید هېڅکله له پامه ونه غورځوي.هغه خبرداری ورکړ چې له طالبانو سره هر ډول سازشکارانه چلند به د دوی کړنو ته مشروعیت ورکړي او بحران به لا پسې ژور کړي.بېنټ همدارنګه وویل چې د معافیت دوام او د بشري حقونو د نقض له سزا پرته پاتې کېدل د افغانانو کړاوونه زیاتوي او د هغوی پر نړیوالې ټولنې باور کمزوری کوي. هغه له د بشري حقونو له شورا وغوښتل چې اغېزمن ګامونه پورته کړي څو د افغانستان د قربانیانو غږ چوپ پاتې نه شي.