د ملګرو ملتونو سخت خبرداری: په افغانستان کې د بشري حقونو دړې وړې کېدو پر درشل کې دي

د ملګرو ملتونو د بشري حقونو دفتر په خپل تازه راپور کې ویلي چې په افغانستان کې د بشري حقونو وضعیت ورځ تر بلې خرابېږي او بشري ناورین هره ورځ ژورېږي.دغه راپور چې نن (سه‌شنبه، د وږي ۱۸مه) خپور شوی، د ګاونډیو هېوادونو څخه د شاوخوا دوو میلیونو افغانانو د اجباري ستنېدنې له څپو سره هم‌مهاله دی، چې د بشري بحران بڼه یې لا نوره درنه کړې ده.ندا ناشف، د ملګرو ملتونو د بشري حقونو د عالي کمیشنر مرستیالې، د بشري حقونو شورا په غونډه کې په اندېښنه سره ویلي: «په افغانستان کې د بشري حقونو وضعیت ډېر نازک دی او نړیواله ټولنه باید ژر تر ژره ګام پورته کړی.»هغې ټینګار کړی چې د ښځو او نجونو پر حقونو بندیزونه، د اساسي روغتیایي او ښوونیزو خدمتونو نه‌شتوالی او د لږکیو د حقونو نقض د هېواد وضعیت سخت کړکېچن کړی دی.راپور همدارنګه پر اقتصادي فشارونو، د لومړنیو خدمتونو پر کموالي او د خلکو پر اجباري کډوالۍ ټینګار کړی او خبرداری ورکړی چې که بیړني ګامونه پورته نه شي، د افغانستان بشري ناورین به د بېرته راګرځېدو له حده واوړي.ندا ناشف نړیوالې ټولنې ته په خطاب کې ویلي: «اوس د عمل وخت دی، نه د خبرو. موږ باید د ټولو ډیپلوماتیکو او بشردوستانه لارو له لارې واکمنان دې ته قانع کړو چې د افغانستان د خلکو بشري حقونه او انساني کرامت په رسمیت وپېژني.»په همدې مهال ریچارد بېنټ، د ملګرو ملتونو د افغانستان لپاره د بشري حقونو ځانګړي راپور ورکوونکي، په ژوره اندېښنه سره ویلي چې نړیواله ټولنه باید اجازه ور نه کړي چې طالبان ورو ورو د یوه عادي واقعیت په توګه ومنل شي.