د ملګرو ملتونو سرمنشي د ماشومانو پر وړاندې د بې‌ سارې تاوتریخوالي په اړه خبرداری ورکړ

انتونیو ګوترش، د ملګرو ملتونو سرمنشي، د ماشومانو پر وړاندې د بې‌سارې تاوتریخوالي د زیاتوالي په اړه خبرداری ورکړی دی.هغه نن (سه‌شنبه، د وږي ۱۸مه) په خپل پیغام کې چې د ایکس په ټولنیز شبکه کې یې خپور کړی، لیکلي چې دغه تاوتریخوالی په ځانګړي ډول د وسلوالو شخړو پر مهال او همدارنګه د زده‌کړو په برخه کې ډېر د اندېښنې وړ دی.ګوټرش ټینګار کړی چې د ماشومانو بنسټیز حقونه د سولې او امنیت په برخه کې باید جدي وڅارل شي او نړیواله ټولنه مسوولیت لري چې د ټولنې تر ټولو زیان‌منو قشرونو ساتنه وکړي.هغه زیاته کړې چې د ماشومانو پر وړاندې تاوتریخوالی نه یوازې د هغوی فزیکي او رواني روغتیا ګواښي، بلکې د ټولنو راتلونکی هم له خطر سره مخ کوي.د ملګرو ملتونو سرمنشي له ټولو هېوادونو غوښتي چې د ماشومانو د امنیت، زده‌کړو او هوساینې د تضمین لپاره بیړني ګامونه پورته کړي.دا خبرداری په داسې حال کې مطرح کېږي چې راپورونه له جګړه‌ ځپلو سیمو ښيي ماشومان د جګړو او بشري ناورینونو تر ټولو ستر زیانمنونکي دي او د هغوی لاسرسی بنسټیزو خدمتونو ته ورځ تر بلې محدودېږي.