یونیسف د ختیځ افغانستان د زلزله ځپلو ماشومانو د مرستې لپاره د ۲۲ میلیونه ډالرو غوښتنه وکړه

د ملګرو ملتونو د ماشومانو د ملاتړ صندوق (یونیسف) ویلي چې د ختیځ افغانستان د وروستیو زلزلو له امله د زیانمنو شویو ماشومانو او کورنیو د بیړنیو اړتیاوو د پوره کولو لپاره ۲۲ میلیونه ډالرو ته عاجلې اړتیا لري.یونیسف د چهارشنبې په ورځ، د وږي ۱۹مه نېټه په یوه خبرپاڼه کې ویلي چې یادې مرستې به د شپږو میاشتو په موده کې ولګول شي او موخه یې نږدې ۴۰۰ زره کسانو ته د خدماتو رسول دي چې له دې ډلې ۲۱۲ زره تنه ماشومان جوړوي.یاد ماشومان د کنړ ولایت په چپه دره، نورګل او سوکي ولسوالیو کې له زیانمنو شویو کسانو څخه ګڼل شوي چې د وروستیو زلزلو وروسته تر ټولو زیات له خطر سره مخ دي.یونیسف ټینګار کړی چې دا بودیجه به د بېلابېلو خدماتو لپاره وکارول شي؛ لکه د بیړنیو روغتیایي خدماتو پراخول، د څښاک د پاکو اوبو برابرول، د حفظ‌الصحې او چاپېریالي روغتیا پیاوړي کول، د د خوړو کموالي مخنیوی او درملنه، د ماشومانو او کورنیو لپاره رواني-ټولنیز ملاتړ، او همدارنګه د زده‌کړو د دوام ډاډ ورکول په اغېزمنو سیمو کې دي.د یونیسف په وینا، ښځې او ماشومان د وروستیو زلزلو تر ټولو ستر زیانمن شوي دي او د عاجلو او پراخو مرستو اړتیا لري. دغه اداره خبرداری ورکړی چې که اړینې مرستې و نه رسېږي، د د خوړو کموالي، ساري ناروغیو او رواني ستونزو خطر به په ځانګړي ډول د ماشومانو ترمنځ په چټکۍ سره زیات شي.