آزیتا نظیمي: طالبان د خبريال کېدل جرم ګڼي او سزا يې مرګ دی

آزیتا نظیمي، خبرياله او د ښځو د حقونو فعاله، وایي چې د طالبانو تاوتریخوالی پر خبريالانو کومه نوې خبره نه ده او دا ډله د واک ته له بېرته رسېدو کلونو مخکې هم خبريالان په نښه کړي و.د نظیمي په وینا، طالبانو په تېرو دوو لسیزو کې بیا بیا خبريالان وژلي، تښتولي او ګواښلي دي؛ خو د دې ډلې د یوه قومندان وروستۍ څرګندونې ښيي چې طالبان اوس پخپله د دغو جنایتونو اعتراف کوي.یاد طالب قومندان په یوه ټکان ورکوونکې وینا کې په ښکاره ویلي دي: «خبرنګاران خاین و. موږ ټول يې وژل. پسې ګرځېدو، خو تښتېدلي وو.»آزیتا نظیمي د دې اعتراف په غبرګون کې وایي: «د طالبانو له نظره خبريال کېدل جرم دی؛ داسې جرم چې سزا يې مرګ دی.»هغې ټينګار وکړ چې د وینا ازادي او د معلوماتو د لاسرسي حق په افغانستان کې عملاً له منځه تللی او خبريالان د بند، زورزیاتي او مرګ له وېرې اړ شوي چې چوپ پاتې شي او یا هېواد پرېږدي.خبريالان او د رسنیو کارکوونکي هم باور لري چې دا ډول ښکاره اعترافات د طالبانو د منظمې تګلارې پرده باسي. د هغوی په اند، خبريال چې د خلکو د خبرولو دنده لري، د طالبانو په لید کې دښمن ګڼل کېږي.له طالبانو د دوهم ځل واکمنېدو وروسته په اګست ۲۰۲۱ کې، افغانستان د رسنیزو فعالیتونو لپاره له خطرناکو هېوادونو څخه یو بلل کېږي. د نړیوالو بنسټونو د راپورونو له مخې، لسګونه رسنۍ تړل شوي، سلګونه خبريالان مجبوره شوي چې هېواد پرېږدي او هغه کسان چې پاتې شوي، له سختو بندیزونو او سانسور سره لاس او ګرېوان دي.