د طالبانو د ښځو پر کار بندیزونه د کډوالو د مرستو وېش ځنډولی دی

د ملګرو ملتونو د کډوالو عالي کمیشنرۍ (UNHCR) اعلان کړی چې د بېرته راستانه شوو کډوالو لپاره د نغدو مرستو وېش د وږي په ۱۸مه نېټه په څو ولایتونو کې ودرول شو.د دې ادارې په وینا، د مرستو وېش مرکزونه په ننګرهار، کندهار، کابل او هرات ولایتونو کې په موقتي ډول تړل شوي دي.د دغې پرېکړې لامل هغه نوی بندیز دی چې طالبان پر ښځو لګولی او له مخې یې ښځینه کارکوونکې اجازه نه لري خپلو دندو ته ولاړې شي.UNHCR ټینګار کړی چې د ښځینه کارکوونکو له شتون پرته، د ټولو بېرته راستانه شوو کډوالو په ځانګړي ډول ښځو او نجونو ته د خوندي، درناوي او برابر خدمتونو وړاندې کول ناشونی دي.یادې ادارې زیاته کړې چې دغه بندیزونه یوازې د ښځو لپاره نه، بلکې د ټولو مراجعینو لپاره ستونزې رامنځته کړې دي.UNHCR ویلي چې له طالب چارواکو سره خبرې روانې دي څو دا ستونزه حل شي او د مرستو وېش مرکزونه ژر تر ژره بېرته فعال شي.دغه اداره ډاډ ورکړی چې د بېرته راستانه شوو کډوالو ملاتړ یې جدي لومړیتوب دی او د مرستو د بیا پیل لپاره عملي لاره لټوي.د کډوالو عالي کمیشنرۍ هر کال په افغانستان کې زرګونو بېرته راستانه شوو کورنیو ته نغدې او غیر نغدې مرستې رسوي، خو د طالبانو له لوري پر ښځو د کار بندیزونه څو ځله د نړیوالو مرستندویو ادارو د کار بهیر ګډوډ کړی دی.